նախընտրելի դարձնել
Համաշխարհային բանկը զարգացող երկրներին կոչ է արել ավելի ակտիվ մշակել արհեստական բանականության կոմպակտ մոդելներ, որոնք կարող են աշխատել բջջային հեռախոսներում՝ թույլ ինտերնետ կապի պայմաններում, հաղորդում է The Guardian-ը։
Տեղական պայմաններին և լեզուներին հարմարեցված նման տեխնոլոգիաները կարող են արագացնել տնտեսական զարգացումը և ԱԲ-ի օգտակար հնարավորությունները ավելի հասանելի դարձնել բնակչության համար։
«Այն երկրների տնտեսական զարգացումը, որոնց հետ մենք համագործակցում ենք, կարող էին դարեր տևել, բայց հիմա մենք հնարավորություն ունենք դրան հասնելու տասնամյակների ընթացքում», — հայտարարել է Համաշխարհային բանկի գիտելիքի հարցերով գլխավոր մասնագետ Պասկալ Դոնոհյուն՝ Իռլանդիայի նախկին ֆինանսների նախարարը։
Ի տարբերություն համընդհանուր համակարգերի, որոնք մշակում են խոշորագույն տեխնոլոգիական ընկերությունները, ԱԲ-ի կոմպակտ մոդելները ուսուցանվում են ավելի նեղ տվյալների հավաքածուների վրա և նախատեսված են կոնկրետ խնդիրներ լուծելու համար։ Դրանք կարող են աշխատել անմիջապես հեռախոսում՝ չպահանջելով ինտերնետին մշտական միացում, և տեղեկատվություն տրամադրել տեղական լեզվով։
Որպես օրինակ Դոնոհյուն նշել է հնդիկ ֆերմերներին, որոնք մասնակցում են Համաշխարհային բանկի AgriConnect գյուղատնտեսական ծրագրին։ Նրանց անհրաժեշտ է հասանելիություն հողի վերլուծությանը և իրենց հասկանալի լեզվով տրվող առաջարկություններին։ Միևնույն ժամանակ, մասնագետները, որոնք կարող էին խորհրդատվություն տրամադրել յուրաքանչյուր փոքր տնտեսությանը, բավարար չեն։
«Հենց այստեղ է օգնության գալիս այն, ինչ մենք անվանում ենք կոմպակտ ԱԲ։ Այն հասանելի է հեռախոսում և թույլ է տալիս բավարարել նման տեղեկատվական կարիքները», — պարզաբանել է Դոնոհյուն։
Նրա կարծիքով, նման լուծումներ կարող են ի հայտ գալ Համաշխարհային բանկի, կառավարությունների և մասնավոր հատվածի համագործակցության շնորհիվ։
Արհեստական բանականության ազդեցությունը զբաղվածության և տնտեսական աճի վրա դարձել է Համաշխարհային բանկի և Արժույթի միջազգային հիմնադրամի այս շաբաթ Բանգկոկում անցկացվող ամենամյա հանդիպումների կենտրոնական թեմաներից մեկը։
ԱՄՀ ղեկավար Կրիստալինա Գեորգիևան ընդգծել է, որ ԱԲ-ի լայն ներդրման համար երկրներին անհրաժեշտ են հուսալի էլեկտրամատակարարում, թվային ենթակառուցվածք և չարաշահումներից պաշտպանության միջոցներ։ Այս պայմանների առկայության դեպքում տեխնոլոգիային հասանելիությունը կարող է զանգվածային դառնալ՝ ինչպես ժամանակին բջջային հեռախոսների տարածումը։
Սակայն ենթակառուցվածքային սահմանափակումները շարունակում են մնալ լուրջ խոչընդոտ։ Օգոստոսին հրապարակված համաշխարհային զարգացման մասին զեկույցում Համաշխարհային բանկը նշել է, որ Սահարայից հարավ գտնվող Աֆրիկայի երկրների գյուղական դպրոցների գրեթե մեկ երրորդում էլեկտրականություն չկա, իսկ ավելի քան երկու երրորդում բացակայում է կայուն ինտերնետ կապը։
Գեորգիևան նաև նախազգուշացրել է, որ հեռանկարում արհեստական բանականությունը կարող է փոխել աշխարհում աշխատատեղերի մինչև 40%-ը՝ լրացնել մարդկային աշխատանքը կամ հանգեցնել որոշ պաշտոնների վերացման։ Հատկապես խոցելի կարող են լինել երիտասարդները, որոնք նոր են մուտք գործում աշխատաշուկա. ավտոմատացումը կարող է կրճատել այն սկզբնական դիրքերի թիվը, որոնք կապված են առօրյա, կրկնվող առաջադրանքների հետ և որոնց միջոցով նրանք սովորաբար ստանում են մասնագիտական փորձ։
Միևնույն ժամանակ Համաշխարհային բանկը ձգտում է ավելի շատ մասնավոր կապիտալ ներգրավել զարգացող տնտեսություններում։ Ըստ Դոնոհյուի, անցած տարվա ընթացքում կազմակերպությունը երաշխիքների և այլ ֆինանսական գործիքների միջոցով մոբիլիզացրել է 120 միլիարդ դոլարի մասնավոր միջոցներ՝ մի շարք երկրների, այդ թվում՝ ԱՄՆ-ի և Մեծ Բրիտանիայի, կողմից օգնության կրճատման պայմաններում։
