Կիրակի Փարիզում կրկին բախումներ են տեղի ունեցել ոստիկանության և անկարգությունների մասնակիցների միջև, որոնք նախօրեին բռնկվել էին Ֆրանսիայի ողջ տարածքում տեղի ունեցած զանգվածային բողոքի ակցիաների ժամանակ։ Հանրապետության հրապարակի շրջանում վերսկսվել են հրդեհները, փողոցային բախումներն ու խանութների թալանը, հաղորդում է France 24-ը։

Ֆրանսիական լրատվամիջոցի տվյալներով, ոստիկանությունը կիրառել է արցունքաբեր գազ և լուսաձայնային նռնակներ։

Շաբաթ օրը կյանքի թանկացման և դպրոցներում պայմանների վատթարացման դեմ ցույցերը մի քանի ֆրանսիական քաղաքներում վերածվել էին զանգվածային անկարգությունների։

Փարիզում դիմակավորված մարդկանց խմբերը բախվել են ոստիկանության հետ, ջարդել խանութներ և վնասել քաղաքային ենթակառուցվածքները։ Կիրակի մայրաքաղաքի կենտրոնի փողոցներում դեռևս մնացել էին կոտրված ցուցափեղկեր, ապակու բեկորներ և վնասված սալահատակ։ Ավելի ուշ անկարգությունները կրկին բռնկվել են Հանրապետության հրապարակի շրջանում, որտեղ ոստիկանությունը արցունքաբեր գազով ցրել է հավաքվածներին։

Ավելի վաղ ոստիկանությունը հայտնել էր Փարիզի շրջանում 855 ձերբակալվածի մասին։ Ամբողջ երկրում ձերբակալվել է առնվազն 1800 մարդ։ Իշխանությունների գնահատմամբ, բողոքի ակցիաներին մասնակցել է մոտ 550 հազար մարդ, իսկ կազմակերպիչները հայտարարել են 800 հազարի մասին։

Անկարգություններ են տեղի ունեցել նաև այլ քաղաքներում։ Լիմոժում հրդեհվել է 19-րդ դարի պատմական քաղաքապետարանը, շենքի տանիքը փլուզվել է։ Մարսելում ցուցարարները կարճ ժամանակով ներթափանցել են քաղաքապետարանի նախասրահ, իսկ Լիոնում հրդեհ է տեղի ունեցել զբոսաշրջային գրասենյակում։ Իշխանությունները բռնության մի մասը կապում են արմատական ձախ խմբերի և այն մարդկանց հետ, որոնք օգտվել են քաոսից՝ թալան իրականացնելու համար։

Ֆրանսիայի նախագահ Էմանուել Մակրոնը նշանակել է կառավարության ներկայացուցիչների հետ արտակարգ խորհրդակցություն և պետք է կիրակի երեկոյան դիմի ֆրանսիացիներին։ Փարիզի, Մարսելի և Լիոնի քաղաքապետերն էլ վարչապետ Սեբաստիան Լըկորնյուից խնդրել են հանդիպում անցկացնել՝ վնասների մասշտաբների և անվտանգության սպառնալիքի պատճառով։