Թուրքիայի Կապիտալի շուկաների խորհրդի (CMB) նախագահ Մահմութ Սութչուն երկուշաբթի հրաժարականի դիմում է ներկայացրել՝ վկայակոչելով առողջական խնդիրները։ Դա տեղի է ունեցել ներդրումային ֆոնդերի ճգնաժամի ֆոնին, որը հանգեցրել է ֆոնդերի փակման, լուծարման վերաբերյալ կարգադրությունների և քրեական հետաքննությունների։

Ճգնաժամը սկսվել էր անցյալ ամիս, երբ մի քանի հիմնադրամներ հայտնել էին, որ չեն կարող բավարարել ներդրողների միջոցների դուրսբերման հայտերը շուկայական զանգվածային վաճառքի ընթացքում։ Դա հիմք է դարձել լայնածավալ հետաքննության համար՝ ցածր իրացվելիությամբ բաժնետոմսերի գների մանիպուլյացիայի կասկածանքով։

Այնուհետև CMB-ն կասեցրել է ակտիվների կառավարման յոթ ընկերությունների կողմից կառավարվող 131 ֆոնդի գործառնությունները։ Սահմանափակումները ազդել են գրեթե 500 հազար ներդրողի վրա։

Ֆինանսների փոխնախարարը ևս հրաժարական է տալիս

Գանձապետարանի և ֆինանսների փոխնախարար Օսման Չելիքը ևս երկուշաբթի կենսաթոշակի անցնելու դիմում է ներկայացրել։ Դրա մասին, հղում անելով նախարարության տեղեկությանը, հայտնել է Anadolu գործակալությունը։

Չելիքը դիմումը փոխանցել է ֆինանսների նախարար Մեհմեթ Շիմշեքին։ Որոշումն ուժի մեջ է մտել նույն օրը։

Նախարարությունում չեն հայտնել նրա հեռանալու պատճառների մասին։ Ի տարբերություն Չելիքի՝ Սութչուն իր հրաժարականը բացատրել է առողջական խնդիրներով։