Թուրքիայի Ազգային հետախուզական կազմակերպության (MIT) ղեկավար Իբրահիմ Քալընը երեքշաբթի Տրիպոլիում հանդիպել է Լիբիայի վարչապետ Աբդել Համիդ Դբեյբայի հետ։ Կողմերը քննարկել են երկրի արևելքում և արևմուտքում գործող մրցակցող վարչակազմերի, ինչպես նաև բաժանված ռազմական կառույցների միավորումը, հաղորդում է Anadolu-ն՝ հղում անելով Թուրքիայի անվտանգության ոլորտի աղբյուրներին։

Բանակցությունները նվիրված են եղել խաղաղության պահպանմանը, քաղաքական և ռազմական հաշտեցմանը, ինչպես նաև մասնատված պետական ինստիտուտները միասնական ղեկավարության ներքո միավորելուն՝ Լիբիայի տարածքային ամբողջականությունը պահպանելու պայմանով։

Քալընը հաստատել է Անկարայի պատրաստակամությունը՝ աջակցելու երկրի արևելյան և արևմտյան շրջանների միջև տարաձայնությունների հաղթահարմանը։ Նա ընդգծել է, որ «բոլոր կողմերը պետք է առաջին տեղում դնեն Լիբիայի ապագան և աշխատեն հանուն ազգային միասնության»։

Զրուցակիցները քննարկել են նաև երկկողմ համագործակցության ընդլայնումը։ Դբեյբան շնորհակալություն է հայտնել Թուրքիային Լիբիայում «անվտանգության և կայունության ամրապնդման ուղղությամբ գործադրած ջանքերի» համար և հայտարարել է իր կառավարության պատրաստակամության մասին՝ «շարունակելու փոխգործակցությունը Անկարայի հետ՝ երկրի տարածքային ամբողջականությունը պահպանելու համար»։

Հանդիպումը տեղի է ունեցել այն օրը, երբ Լիբիայի Ներկայացուցիչների պալատը հավանություն է տվել Թուրքիայի հետ ծովային իրավազորությունների սահմանազատման մասին համաձայնագրին, որը նախկինում լիբիական կողմը մերժել էր։ Քալընը շնորհակալություն է հայտնել Դբեյբային, վերջերս Ներկայացուցիչների պալատի նախագահ ընտրված Սալեհ Աբդուննաբիին և Լիբիայի ազգային բանակի գլխավոր հրամանատարի տեղակալ Սադդամ Հաֆթարին՝ փաստաթղթի հաստատմանը նպաստելու համար։

Թուրքիան և Լիբիան 2019 թվականի նոյեմբերին Միջերկրական ծովում ծովային իրավազորությունների սահմանազատման մասին համաձայնագիր են ստորագրել։ Փաստաթուղթը սահմանում է երկու երկրների համապատասխան ծովային գոտիների սահմանները։