Ֆրանսիայի նախագահ Էմանուել Մակրոնը հայտարարել է, որ բողոքի ցույցերի և դրանց ուղեկցող անկարգությունների ֆոնին երկրում արտակարգ դրություն մտցնելու անհրաժեշտություն չի տեսնում։

«Այն ամենը, ինչի մասին ձեզ պատմեցի և ինչի շնորհիվ երկուշաբթի օրվանից հաջողվել է վերականգնել հանգստությունը, արտակարգ դրություն մտցնել չի պահանջում»,— Կատար կատարած այցի ընթացքում լրագրողներին ասել է նա՝ մեկնաբանելով գնաճի և բնակչության գնողունակության անկման դեմ բողոքի ակցիաների ֆոնին հոկտեմբերի 17-ին ու 18-ին երկրում տեղի ունեցած անկարգությունները։ Մակրոնի հայտարարությունը հեռարձակել է Ելիսեյան պալատի մամուլի ծառայությունը։

Ֆրանսիայի առաջնորդը նշել է, որ արտակարգ դրության ռեժիմը կարող է գործադիր իշխանությանը թույլ տալ խորհրդարանը շրջանցելով՝ հրամանագրերի հիման վրա օպերատիվ միջոցներ կիրառել, սակայն արդեն 12 օր անց այն երկարաձգելու համար միևնույն է կպահանջվի համապատասխան օրենք ընդունել։ Նա հստակեցրել է, որ տեղական իշխանություններն առանց արտակարգ դրություն հայտարարելու էլ լիազորված են պարետային ժամ սահմանել կամ արգելել հանրային ակցիաները։ «Իհարկե, եթե իրավիճակը պահանջի, մենք կարող ենք դիմել այդ քայլին։ Բայց մենք ձգտում ենք հանգստությունը վերականգնել հաստատակամության, կարգուկանոնի ապահովման միջոցառումների, ինչպես նաև [ցուցարարների] օրինական պահանջների շուրջ երկխոսության միջոցով»,— ասել է նա։

Պետության ղեկավարը հայտնել է նաև, որ հոկտեմբերի 22-ին հանդիպում կանցկացնի վարչապետի, ոլորտային նախարարների և ուժային գերատեսչությունների ներկայացուցիչների հետ, որի ընթացքում իրեն ամբողջական զեկույց կներկայացնեն հոկտեմբերի 17-ի իրադարձությունների և իրավիճակի նման անբարենպաստ զարգացման պատճառների մասին։ Նա նաև խոստացել է, որ հոկտեմբերի 24-ին Ֆրանսիայում նախատեսված բողոքի ցույցերի նոր ալիքի ընթացքում իրավապահ մարմինները թույլ չեն տա անկարգությունների կրկնություն քաղաքների կենտրոնում։ Այդ նպատակով կձեռնարկվեն անվտանգության ապահովման և օպերատիվ տվյալների հավաքագրման ուժեղացված միջոցառումներ, մինչդեռ կառավարության ղեկավար Սեբաստիան Լեկոռնյուն բանակցություններ կվարի արհմիությունների ներկայացուցիչների հետ։

Նախորդ հանգստյան օրերին Ֆրանսիայում զանգվածային ցույցեր էին անցկացվել ընդդեմ վառելիքի գների թանկացման և բնակչության գնողունակության անկման։ Կազմակերպիչների գնահատմամբ՝ ակցիաներին մասնակցել է 800 հազար մարդ, թեև ՆԳՆ-ն հաշվարկել էր 550 հազար։ Մի շարք քաղաքներում ելույթները վերածվել էին անկարգությունների և ոստիկանության հետ բախումների։ Ինչպես հայտնել էր արդարադատության նախարար Ժերալդ Դարմանենը, հոկտեմբերի 17-ին թալանվել էր մոտ 3 հազար խանութ, և բերման էր ենթարկվել ավելի քան 2,5 հազար մարդ։