նախընտրելի դարձնել
Արգենտինայի նախագահ Խավիեր Միլեյը Մադրիդ կատարած այցի ընթացքում Իսպանիայի վարչապետ Պեդրո Սանչեսին «բռնապետ» և «գող» է անվանել, հայտնում է RTVE-ն։
Արգենտինայի առաջնորդը հայտարարել է, որ մտադիր չէ հանդիպել Իսպանիայի կառավարության ղեկավարի հետ, և նրան մեղադրել է ընտրություններում հաղթելու համար միգրացիոն ճգնաժամն օգտագործելու մեջ։
«Ես չեմ պատրաստվում այցելել Սանչեսի նման հանցագործի և գողի, որովհետև այդ դեպքում ստիպված կլինեի կարել գրպաններս, որպեսզի կողոպտված չհեռանամ»,- հայտարարել է Միլեյը՝ ելույթ ունենալով Forum Europa-ի միջոցառմանը։
Նա Սանչեսին մեղադրել է նաև նրանում, որ վերջինս միտումնավոր խրախուսում է ներգաղթյալների զանգվածային հոսքը դեպի Սեուտա՝ Աֆրիկայի հյուսիսում գտնվող իսպանական անկլավ, որպեսզի ստանա ընտրողների լրացուցիչ աջակցությունը։ Տարբեր գնահատականներով՝ հուլիսի վերջի դրությամբ մինչև 80 հազար ներգաղթյալ է ժամանել Սեուտա, որոնց մեծ մասը, ըստ պաշտոնական տվյալների, հետագայում վերադարձել է Մարոկկո։
Իսպանական պետական RTVE հեռուստառադիոընկերությունը Միլեյի հայտարարությունները գնահատել է որպես միջամտություն նախընտրական արշավին։ Սանչեսի ձախակողմյան կոալիցիայի ներկայացուցիչներն ի սկզբանե չմեկնաբանեցին Արգենտինայի նախագահի հայտարարությունները։
Իսպանիայում արտահերթ խորհրդարանական ընտրությունները նշանակված են նոյեմբերի 29-ին: Ավելի վաղ խորհրդարանը մերժեց բնակարանային ճգնաժամի լուծմանն ուղղված մի շարք միջոցառումներ։ Ըստ հարցումների՝ ծայրահեղ աջ Vox կուսակցությունը կարող է մոտավորապես կրկնապատկել խորհրդարանում իր մանդատների թիվը՝ ներկայիս 33-ի փոխարեն, և վճռորոշ դեր խաղալ հաջորդ կառավարության ձևավորման հարցում։
Vox-ի առաջնորդ Սանտյագո Աբասկալը պաշտպանել է Միլեյին՝ հայտարարելով, որ նրա խոսքերը վիրավորանքներ չեն եղել։ Ըստ Աբասկալի՝ ինքը ևս բազմիցս Սանչեսին «բռնակալ» և «ավտոկրատ» է անվանել, ինչպես նաև նրան Իսպանիայի համար սպառնալիք է համարում։ Միլեյին նա անվանել է ընկեր և դաշնակից։
Միլեյի և Սանչեսի հարաբերությունները սրվել էին դեռևս 2024 թվականին, երբ Արգենտինայի նախագահը Իսպանիայի վարչապետին և նրա կնոջը՝ Բեգոնյային, մեղադրել էր կոռուպցիայի մեջ։ Այդ ժամանակ Իսպանիայի արտգործնախարար Խոսե Մանուել Ալբարեսն այդ հայտարարություններն անվանել էր ուղիղ հարձակում իսպանական ժողովրդավարության և պետական ինստիտուտների դեմ։ Մադրիդը մի քանի ամսով հետ էր կանչել իր դեսպանին Բուենոս Այրեսից։
