Մալայզիայի իշխանությունները պետական ծառայողներին արգելել են օգտվել Waze նավիգացիոն հավելվածից՝ տվյալների անվտանգության վերաբերյալ մտահոգությունների և ծառայության՝ Իսրայելի հետ ունեցած կապերի պատճառով։ Դրա մասին չորեքշաբթի հայտնել է երկրի վարչապետ Անվար Իբրահիմի գրասենյակը, հաղորդում է Ֆրանսպրես գործակալությունը։

Որոշումն ընդունվել է երեքշաբթի Անվարի նախագահությամբ անցկացված Կիբեռանվտանգության ազգային կոմիտեի նիստում։ Կառավարությունում հայտարարել են, որ ցանկանում են պաշտպանել պետական տեղեկատվությունն ու քաղաքացիների անձնական տվյալները՝ Իսրայելի իշխանությունների կողմից դրանց հնարավոր օգտագործումից՝ ի վնաս երկրի ազգային անվտանգության և ինքնիշխանության։

Waze-ը պատկանում է ամերիկյան Google ընկերությանը, սակայն ծառայությունը հիմնադրվել է Իսրայելում և մինչ օրս այնտեղ է գրանցված։ Մալայզիան վաղուց ի վեր կտրուկ քննադատական դիրքորոշում է զբաղեցնում Իսրայելի նկատմամբ և նրա հետ դիվանագիտական հարաբերություններ չի պահպանում։

Երկրի վարչապետն օգտատերերին առաջարկել է անցնել այլընտրանքային ծառայությունների, մասնավորապես՝ Մալայզիայում մշակված TuJu նավիգացիոն հավելվածին։ Միևնույն ժամանակ իշխանությունները չեն հստակեցրել, թե ինչպես են վերահսկելու արգելքի պահպանումը և ինչ միջոցներ են նախատեսված դրա խախտման համար։

Waze-ը լայնորեն օգտագործվում է Մալայզիայում, ներառյալ՝ Grab տաքսի պատվերի ծառայության վարորդների շրջանում՝ որպես լրացուցիչ նավիգացիոն գործիք։