նախընտրելի դարձնել
Եվրասիական տնտեսական միությունը (ԵԱՏՄ) մնում է Հայաստանի առանցքային տնտեսական գործընկերը՝ ապահովելով երկրի արտաքին առևտրաշրջանառության շուրջ 36%-ը։ Այս մասին են վկայում Եվրասիական վարկանիշային գործակալության հետազոտության տվյալները։
«ԵԱՏՄ-ն շարունակում է մնալ Հայաստանի գլխավոր տնտեսական գործընկերը՝ ապահովելով հանրապետության արտաքին առևտրաշրջանառության մոտ 36%-ը։ Փոխադարձ առևտուրը 2025 թվականին կայուն աճ է գրանցել, չնայած վերաարտահանման ծավալների կրճատման պատճառով առևտրաշրջանառության ընդհանուր նվազմանը»,- նշվում է փաստաթղթում։
Հետազոտությունում ընդգծվում է նաև, որ Ռուսաստանն առաջատար դիրքեր է պահպանում ներդրումային համագործակցության և ֆիզիկական անձանց դրամական փոխանցումների ոլորտում (ընդհանուր ծավալի 64,9%-ը), սակայն երկու ցուցանիշներն էլ աստիճանաբար նվազելու միտում ունեն։ Միևնույն ժամանակ, ռուսական գազի գնային առավելությունը Հայաստանի տնտեսության մրցունակության կարևորագույն գործոնն է, իսկ ԵԱՏՄ էներգետիկ ընդհանուր շուկաների ձևավորմանը մասնակցությունը նոր հնարավորություններ է բացում էլեկտրաէներգիայի արտահանման համար։
Զեկույցի հեղինակները շեշտում են, որ մաքսատուրքերի բաշխման համակարգը Հայաստանին ապահովում է կայուն բյուջետային մուտքերով, թեև հանրապետության մասնաբաժինը (1,22%) ամենափոքրն է ԵԱՏՄ անդամ պետությունների շարքում։ Բացի այդ, 2025 թվականին գործարկված արդյունաբերական կոոպերացիայի մեխանիզմներն ու երրորդ երկրների հետ արտոնյալ առևտրային համաձայնագրերը լրացուցիչ խթաններ են ստեղծում ինտեգրացիոն զարգացման համար։
«Աշխարհաքաղաքական երկընտրանքը՝ ԵՄ-ի հետ մերձեցումը ԵԱՏՄ-ին անդամակցությանը զուգահեռ, ամենալուրջ մարտահրավերն է, ինչը Հայաստանի իշխանություններից պահանջում է գտնել հավասարակշռված լուծումներ»,- եզրակացնում են զեկույցի հեղինակները։
