Գերմանիայում կալանավորվել է 21-ամյա մի քաղաքացի, որը կասկածվում է «Իսլամական պետություն» (ԻՊ) ահաբեկչական կազմակերպությանը անդամակցելու փորձի մեջ։

Ըստ dpa գործակալության՝ կասկածյալին ուրբաթ օրը Պակիստանից արտահանձնել են Գերմանիա։

Դատախազության տվյալներով՝ 2025 թվականի հունվարին երիտասարդը Բեռլինից մեկնել է Եթովպիա՝ մտադրվելով միանալ Սոմալիում գործող ԻՊ ստորաբաժանմանը և զինվորական պատրաստություն անցնել։ Սակայն, ըստ քննության վարկածի, նա Սոմալի չի հասել և դրա փոխարեն ուղևորվել է Պակիստան, որտեղ նույնպես պատրաստվում էր համալրել ահաբեկչական խմբավորման շարքերը։

2025 թվականի փետրվարին կասկածյալը ձերբակալվել է Պակիստանում։ Գերմանիա տեղափոխվելուց հետո Կարլսռուեի Դաշնային գերագույն դատարանի քննիչ-դատավորն ի կատար է ածել նրան կալանավորելու որոշումը։ Գլխավոր դաշնային դատախազության ներկայացուցիչը շաբաթ օրը հաստատել է այս տեղեկությունը։

Երիտասարդը կասկածվում է արտերկրում ահաբեկչական կազմակերպությանն անդամակցելու փորձի և պետական անվտանգությանը սպառնացող ծանր հանցագործություն նախապատրաստելու մեջ։ Գերմանական օրենսդրության համաձայն՝ վերջին արարքը կարող է ավարտված հանցագործություն համարվել արդեն այն պահից, երբ անձը լքում է երկիրը՝ արտասահմանում ահաբեկչական խմբավորմանը միանալու կամ նրա ճամբարներում վարժանքներ անցնելու նպատակով։

Գերմանիայի գլխավոր դաշնային դատախազությունը քննում է առավել ծանր հանցագործությունների, այդ թվում՝ ահաբեկչության, լրտեսության և միջազգային հանցագործությունների հետ կապված գործերը։