Ալբանիայի մայրաքաղաք Տիրանայում ոստիկանությունը կիրառել է արցունքաբեր գազ և ջրցան մեքենաներ՝ ներքին գործերի նախարարության և վարչապետի գրասենյակի շենքերի մոտ հավաքված բողոքի ակցիայի մասնակիցներին ցրելու համար։

Ալբանական ռադիոյի և հեռուստատեսության (RTSH) տվյալներով՝ ոստիկանները կառավարության շենքի մոտ շղթա են կազմել և ցուցարարների ուղղությամբ կիրառել ջրաշիթեր ու արցունքաբեր գազ։ Բախումները տեղի են ունեցել այն ժամանակ, երբ ակցիայի մասնակիցների մի մասը տեղափոխվել է երկրի վարչապետի գրասենյակի մոտ, մինչդեռ մյուսները շարունակել են մնալ Ներքին գործերի նախարարության առջև։

Ցուցարարները հավաքվել են նաև կրթության նախարարության շենքի մոտ, որտեղ ուսանողներին միացել են Դեմոկրատական կուսակցության կողմնակիցները։ Սկզբում ակցիան անցել է խաղաղ, սակայն ավելի ուշ նախարարության շենքի վրա քարեր են նետել։ Ոստիկանությունը պատասխանել է ջրցան մեքենաների կիրառմամբ։

Ակցիան շարունակում է մնալ տարանջատված․ մասնակիցները գտնվում են մայրաքաղաքի մի քանի շրջաններում, իրավապահ մարմիններն ուժեղացրել են իրենց ներկայությունը փողոցներում՝ իրավիճակը վերահսկելու համար։