նախընտրելի դարձնել
ԱՄՆ-ում Հելոուինի համար կոնֆետների վաճառքը նվազում է կյանքի և շոկոլադի թանկացման ֆոնին, պարզել է Associated Press գործակալությունը։
Մեկ ամսում, որն ավարտվել է հոկտեմբերի 17-ին, քաղցրեղենի վաճառքը նվազել է 6,7 տոկոսով՝ նախորդ տարվա նույն ժամանակահատվածի համեմատ, հայտնել է NielsenIQ հետազոտական ընկերությունը։ Սեպտեմբերի կեսերին անկումը կազմել էր 11,7 տոկոս, ինչը զրոյացրել է նախորդ երկու տարիներին տոնի նախաշեմին գրանցված վաճառքների աճը։
NielsenIQ-ի փոխնախագահ Քրիս Կոստալյայի խոսքով՝ ամերիկացիները ստիպված են ավելի շատ ծախսել վառելիքի, բնակարանի, հագուստի և սննդի վրա, ուստի նրանց մոտ ավելի քիչ գումար է մնում տոնական հյուրասիրությունների համար։ Ուրբաթ ԱՄՆ-ում սովորական բենզինի մեկ գալոնի միջին գինը հասել է 4,29 դոլարի՝ գրեթե 40 տոկոսով ավելի, քան մեկ տարի առաջ։
«Խնդիրն անպայման այն չէ, որ գնորդները նկատում են կոնֆետների թանկացումը նախորդ տարվա համեմատ։ Նրանք պարզապես չեն կարող իրենց թույլ տալ դրանք գնել այս տարի, քանի որ ստիպված են շատ ավելի ծախսել այլ ապրանքների և ծառայությունների վրա», — պարզաբանել է Կոստալյան։
NielsenIQ-ի տվյալներով՝ հոկտեմբերի կեսերին վաճառքների աճ արձանագրվել է միայն փոքր փաթեթավորմամբ կոնֆետների դեպքում։ Մեծ և շատ մեծ փաթեթների վաճառքն ամենից շատն է նվազել։
Պետական տվյալների համաձայն՝ վերջին հինգ տարվա ընթացքում ԱՄՆ-ում կոնֆետներն ու մաստակը թանկացել են 44 տոկոսով։ Համեմատության համար նշենք, որ տնային սպառման համար նախատեսված սննդամթերքի գները նույն ժամանակահատվածում աճել են 22,5 տոկոսով։ Օրինակ՝ Aldi ցանցն առաջարկում էր Mars-ի 135 շոկոլադե սալիկից բաղկացած հավաքածու 19,87 դոլարով՝ գրեթե նույնքան, որքան հինգ տարի առաջ արժեր 250 սալիկից բաղկացած հավաքածուն։
Շոկոլադի թանկացման գլխավոր պատճառը կակաոյի գների աճն է։ 2025 թվականի հունվարին դրանք հասել էին ռեկորդային՝ մեկ տոննայի համար 10 710 դոլարի՝ Արևմտյան Աֆրիկայում անբարենպաստ եղանակային պայմանների պատճառով, որին բաժին է ընկնում կակաոյի համաշխարհային մատակարարումների մոտ 70 տոկոսը, ինչպես նաև ֆյուչերսային շուկայում սպեկուլյատիվ գործարքների հետևանքով։ Մարտին գները նվազել էին մինչև մեկ տոննայի համար 3 241 դոլար, սակայն գարնանը կրկին սկսել էին աճել՝ Իրանի հետ պատերազմի պատճառով պարարտանյութերի մատակարարումների խափանումների ֆոնին։ Բերքի համար լրացուցիչ ռիսկ է համարվում Էլ Նինյո երևույթը, որը կարող է բերել շոգ և չոր եղանակ։
Միևնույն ժամանակ, քաղցրեղենի որոշ տեսակների գների նվազումն առայժմ չի խթանում պահանջարկը։ Ոչ շոկոլադե կոնֆետների, ներառյալ մարմելադն ու սառնաշաքարները, միջին արժեքը կազմել է 6,08 դոլար մեկ ֆունտի համար՝ մոտ 3 տոկոսով պակաս, քան մեկ տարի առաջ, սակայն վաճառքները չեն աճել։
Փորձագետները չեն բացառում, որ գնորդները քաղցրեղենի գնումը հետաձգում են մինչև տոներին նախորդող վերջին օրերը, քանի որ ավելի ու ավելի հաճախ խանութ են գնում ապրանքների փոքր խմբաքանակների հետևից անմիջապես դրանց օգտագործումից առաջ։ ԱՄՆ հրուշակեղեն արտադրողների ազգային ասոցիացիան, իր հերթին, պահպանում է լավատեսությունը՝ նշելով, որ Հելոուինի գնումների գագաթնակետը դեռ առջևում է։
