Եվրոպական ֆոնդային ինդեքսները ուրբաթ օրը հիմնականում նվազել են

Ուրբաթ օրվա առևտրային նստաշրջանն Արևմտյան Եվրոպայի ֆոնդային շուկաները հիմնականում ավարտել են անկմամբ. ներդրողները գնահատում էին վիճակագրական տվյալներն ու ընկերությունների ֆինանսական հաշվետվությունները։

Տարածաշրջանի խոշորագույն ընկերությունների Stoxx Europe 600 համահավաք ինդեքսը նվազել է 0,3%-ով՝ կազմելով 635,77 կետ։ Bloomberg գործակալության հարցված վերլուծաբանները կանխատեսում են, որ տարեվերջին ցուցանիշը կհասնի 645 կետի։

Բրիտանական FTSE 100-ը նույնպես կորցրել է 0,3%, գերմանական DAX-ը՝ 0,8%, իսկ ֆրանսիական CAC 40-ը՝ 0,4%։ Միևնույն ժամանակ, իտալական FTSE MIB-ը և իսպանական IBEX 35-ը գրանցել են 0,4-ական տոկոս աճ։

Մեծ Բրիտանիայի Ազգային վիճակագրական ծառայության տվյալներով՝ սեպտեմբերին երկրում մանրածախ վաճառքի ծավալը նախորդ ամսվա համեմատ նվազել է 0,4%-ով։ Օգոստոսին, վերանայված տվյալների համաձայն, ցուցանիշն աճել էր 0,7%-ով, այլ ոչ թե 0,5%-ով։ Տարեկան կտրվածքով վաճառքի ծավալն անցած ամիս ավելացել է 0,8%-ով՝ նախորդ ամսվա 2,7% աճից հետո։

NIQ GfK վերլուծական ընկերության հաշվետվության համաձայն՝ Բրիտանիայում սպառողների վստահության ինդեքսը հոկտեմբերին նախորդ ամսվա -13 կետից իջել է մինչև -24 կետ։ Սա ամենախոր անկումն է 2020 թվականի ապրիլից ի վեր։

Ըստ S&P Global-ի նախնական տվյալների՝ եվրագոտում գնումների մենեջերների համահավաք ինդեքսը (PMI) հոկտեմբերին կազմել է 51,9 կետ՝ սեպտեմբերի 53,1 կետի դիմաց։ Եվրագոտու արդյունաբերական PMI-ը 52,9 կետից իջել է 52,4 կետի, իսկ ծառայությունների ոլորտի ինդեքսը՝ 53-ից 51,7 կետի։ 50 կետից բարձր ցուցանիշը վկայում է տնտեսական ակտիվության աճի մասին։

Գերմանիայում համահավաք PMI-ը սեպտեմբերի 53,8 կետից նվազել է մինչև 52,8 կետ։ Արդյունաբերական ինդեքսը կազմել է 54,2 կետ՝ նախորդ ամսվա 53,9 կետի դիմաց, իսկ ծառայությունների ոլորտի PMI-ը՝ 51,7 կետ՝ 52,9 կետի դիմաց։

Ֆրանսիական համահավաք PMI-ը հոկտեմբերին իջել է 48,4 կետի՝ սեպտեմբերի 51,1 կետի համեմատ։ Արդյունաբերության ոլորտի ինդեքսը 50,6 կետից նվազել է 49,3 կետի, իսկ ծառայությունների ոլորտինը՝ 51,2-ից 48,4 կետի։

Մեծ Բրիտանիայի համահավաք PMI-ը սեպտեմբերի 52 կետից բարձրացել է 53,1 կետի։ Արդյունաբերական PMI-ն աճել է՝ 51,9 կետից հասնելով 52,8 կետի, իսկ ծառայությունների ոլորտինը՝ 52,1-ից 53,1 կետի։

Միևնույն ժամանակ, եվրագոտում սպառողների գնաճային սպասումների ինդեքսն անցած ամիս օգոստոսի 3%-ից աճել է մինչև 3,1%՝ հասնելով վերջին չորս ամսվա առավելագույն մակարդակին։

Stoxx 600-ի կազմում ամենամեծ անկումը գրանցել է ֆրանսիական Kering-ը (-16,6%)։ Նորաձևության բրենդներ միավորող ընկերության հասույթն անցած եռամսյակում համապատասխանել է շուկայի սպասումներին, սակայն նրա առանցքային ապրանքանիշի՝ Gucci-ի վաճառքի ցուցանիշները զիջել են փորձագետների կանխատեսումներին։

Շվեդական Lifco ներդրումային ընկերության և ավտոպահեստամասեր մատակարարող ֆրանսիական Valeo-ի շուկայական կապիտալիզացիան թույլ եռամսյակային հաշվետվությունների պատճառով կրճատվել է համապատասխանաբար 12,1%-ով և 11,5%-ով։

Բեռնման-բեռնաթափման տեխնիկա արտադրող ֆիննական HIAB-ի արժեթղթերն էժանացել են 11,7%-ով՝ չնայած հուլիս-սեպտեմբեր ամիսների դրական ցուցանիշներին։

Շվեդական Volvo Cars-ի բաժնետոմսերի գինը կտրուկ նվազել է՝ 24,2%-ով. ավտոարտադրողն անցած եռամսյակն ավարտել է զուտ վնասով, իսկ հասույթը կրճատվել է 23%-ով։

BE Semiconductor-ի շուկայական արժեքը նվազել է 7,7%-ով, Rolls-Royce Holdings-ինը՝ 7,6%-ով, Compagnie Financiere Richemont-ինը՝ 6,4%-ով, իսկ Stellantis-ինը՝ 6,3%-ով։

Stoxx 600-ի կազմում ամենաբարձր աճը գրանցել են հանրային սննդի ծառայություններ մատուցող Sodexo-ի արժեթղթերը՝ թանկանալով 6,3%-ով։ Ավելի վաղ ֆրանսիական ընկերությունը հրապարակել էր օգոստոսին ավարտված ֆինանսական տարվա հաշվետվությունը, ըստ որի՝ տարեկան հասույթն ու գործառնական շահույթը գերազանցել են փորձագետների գնահատականները։

Օգտագործված տարաների ընդունման ավտոմատներ և աղբի տեսակավորման սենսորային համակարգեր արտադրող նորվեգական Tomra Systems-ի կապիտալիզացիան աճել է 1,5%-ով՝ երրորդ եռամսյակում հասույթի և զուտ շահույթի զգալի աճ արձանագրած հաջող հաշվետվությունից հետո։

Շվեյցարական Holcim-ի շուկայական արժեքն ավելացել է 5%-ով։ Շինանյութեր արտադրող ընկերությունն անցած եռամսյակի բարձր արդյունքների շնորհիվ բարելավել է իր տարեկան կանխատեսումը։

Ֆրանսիական L'Oreal-ի կապիտալիզացիան աճել է 5,6%-ով. կոսմետիկա արտադրող ընկերության հուլիս-սեպտեմբերի հասույթը գերազանցել է վերլուծաբանների սպասումները։

Իտալական Eni-ի բաժնետոմսերը թանկացել են 5,8%-ով։ Նավթագազային ընկերությունը հայտնել է անցած եռամսյակում զուտ շահույթի քառապատիկ աճի, ինչպես նաև մեկ բաժնետոմսի դիմաց 0,46 եվրո հատուկ շահաբաժին վճարելու մասին։

Թանկացել են նաև ոլորտի մյուս ընկերությունների բաժնետոմսերը, այդ թվում՝ BP Plc-ինը՝ 4,4%-ով, Shell-ինը՝ 3,7%-ով, TotalEnergies-ինը՝ 4,3%-ով, իսկ Equinor-ինը՝ 5,1%-ով։