Սաուդյան Արաբիան և Սինգապուրը պայմանավորվել են 2027 թվականի երկրորդ կեսից սաուդյան նավթը պահեստավորել Սինգապուրի ստորգետնյա ամբարներում. սա թույլ կտա Մերձավոր Արևելքում հնարավոր խափանումների դեպքում անխափան մատակարարումներ ապահովել Հարավարևելյան Ասիայի համար։

«Սինգապուրի էներգետիկայի, առևտրի և արդյունաբերության նախարարությունն ու Սաուդյան Արաբիայի Թագավորության էներգետիկայի նախարարությունն այսօր հայտարարել են Սինգապուրում նավթի պահեստարան ստեղծելու համատեղ մտադրության մասին։ Առաջարկվող ծրագրի համաձայն՝ սաուդյան նավթը կպահվի համանուն կղզում գտնվող «Ջուրոնգ» ստորգետնյա ամբարներում։ Ակնկալվում է, որ պահեստավորման գործընթացը կմեկնարկի 2027 թվականի երկրորդ կեսին», — ասվում է Սինգապուրի էներգետիկայի, առևտրի և արդյունաբերության նախարարության կայքում հրապարակված հաղորդագրության մեջ։

Գերատեսչության հայտարարությունում նաև նշվում է, որ «նավթի պահեստավորումը թույլ կտա մատակարարումների խափանման դեպքում ապահովել Սինգապուրի էներգետիկ կարիքները»՝ ամրապնդելով երկրի էներգետիկ անվտանգությունը։ Բացի այդ, այս նախաձեռնությունը կբարձրացնի ամբողջ Հարավարևելյան Ասիային սաուդյան նավթի մատակարարման շղթայի հուսալիությունը։

Հոկտեմբերի սկզբին Մանիլայում կայացած Ասիական զրոյական արտանետումների համայնքի նախարարական հանդիպմանը Սաուդյան Արաբիան և Արաբական Միացյալ Էմիրությունները պատրաստակամություն էին հայտնել Ճապոնիայի աջակցությամբ օգնել ԱՍԵԱՆ-ի երկրներին նավթի պաշարներ ձևավորելու հարցում՝ Պարսից ծոցի ճգնաժամի պայմաններում նրանց խոցելիությունը հաղթահարելու համար։ Ներքին չափազանց սուղ պաշարների պատճառով տարածաշրջանին հումքի սուր պակաս է սպառնում, ուստի Հարավարևելյան Ասիայի երկրներում որոշել են ներդնել ճապոնական մոդելը. Տոկիոն իր ամբարները վարձակալության է տալիս մերձավորարևելյան արտահանողներին՝ ճգնաժամային իրավիճակներում այդ նավթն առաջնահերթության կարգով գնելու իրավունքի դիմաց։