նախընտրելի դարձնել
Բանանի գինը կարող է շուտով բարձրանալ «Էլ Նինյո» կլիմայական երևույթի և աշխարհաքաղաքական ցնցումների պատճառով։ Նման կարծիք է հայտնել «Chiquita Brands International» ընկերության գլխավոր տնօրեն Կառլոս Լոպես Ֆլորեսը։
«Ոլորտն այսօր բախվում է եղանակային ծայրահեղ անոմալիաների և աշխարհաքաղաքական ցնցումների,— նշել է նա «Bloomberg» գործակալությանը տված հարցազրույցում։— Այս արևադարձային մրգի արտադրության ինքնարժեքը գնալով ավելի ու ավելի է թանկանում»։
Ֆլորեսի խոսքով՝ 2027 թվականին, ամենայն հավանականությամբ, ավելի քիչ բանան կվաճառվի, ընդ որում՝ ավելի բարձր գնով։ «Ոլորտին շատ բարդ ժամանակներ են սպասվում 2026 թվականի վերջին և չափազանց ծանր՝ հաջորդ տարվա սկզբին»,— հավելել է նա։
Գործակալությունը նշում է, որ «Էլ Նինյոն» արդեն իսկ ազդում է բանանի գլխավոր մատակարար հանդիսացող Լատինական Ամերիկայի վրա։ Մասնավորապես՝ բնական այս երևույթը հորդառատ անձրևների պատճառ է դարձել Պերուում և Էկվադորում, ինչը կարող է հանգեցնել բերքի փչացման ու ճանապարհների ողողման։
Երկրագնդի կլիման և եղանակը մեծապես կախված են բնական երկու երևույթներից՝ «Էլ Նինյոյից» և «Լա Նինյայից» (իսպաներենից թարգմանաբար՝ «տղա» և «աղջիկ»)։ Առաջինն ուղեկցվում է Խաղաղ օվկիանոսի կենտրոնական և արևելյան հատվածներում ջրի վերին շերտի կտրուկ տաքացմամբ, իսկ երկրորդը՝ դրանց սառեցմամբ։ Ջերմաստիճանի այս տատանումները շղթայական փոփոխություններ են առաջացնում գլոբալ կլիմայական համակարգի այլ օղակներում, որոնք անմիջականորեն կապված չեն օվկիանոսի ջրի ջերմաստիճանի հետ։ Ինչպես սեպտեմբերի սկզբին հայտնել էր Համաշխարհային օդերևութաբանական կազմակերպությունը, «Էլ Նինյոյի»՝ մինչև 2027 թվականի փետրվար պահպանվելու հավանականությունը «գրեթե 100% է»։ Ըստ կառույցի՝ առաջիկա ամիսներին սպասվում է այս ֆենոմենի «չափազանց մեծ ակտիվություն», իսկ իր գագաթնակետին այն կհասնի ընթացիկ տարեվերջին։
