Իսրայելի վարչապետ Բենիամին Նեթանյահուի դաշինքն առաջատար է խորհրդարանական ընտրությունների արդյունքներով, սակայն նախնական արդյունքները նրան թույլ չեն տալիս ակնկալել մեծամասնություն Քնեսեթում, գրում է Axios-ը։

Ձայների 85%-ի հաշվարկից հետո նրա կողմնակիցները կարող են ստանալ 53 տեղ, իսկ Գադի Այզենկոտի գլխավորած ընդդիմադիր դաշինքը՝ 48։ Կառավարություն ձևավորելու համար անհրաժեշտ է առնվազն 61 պատգամավորի աջակցությունը։

Դեռ պետք է հաշվարկվի շուրջ 500 հազար քվեաթերթիկ։ Դրանց թվում են զինծառայողների, դիվանագետների, բանտարկյալների և ընտրողների այլ խմբերի ձայները։ Սակայն, նախնական գնահատականներով, դրանց հաշվարկը դժվար թե էապես փոխի ուժերի հարաբերակցությունը։

Այսպիսով, Նեթանյահուի առավելությունը դեռ չի երաշխավորում կառավարություն ձևավորելու նրա հնարավորությունը։ Եթե քաղաքական ուժերը չհամաձայնեն կոալիցիա կազմելու շուրջ, Իսրայելում կարող են հերթական արտահերթ ընտրություններն անցկացվել արդեն ապրիլին։

Երկրի նախագահ Իցհակ Հերցոգը հաջորդ շաբաթ պետք է խորհրդակցություններ սկսի կուսակցությունների ներկայացուցիչների հետ։ Դրանց արդյունքներով նա քաղաքական գործիչներից մեկին կհանձնարարի կառավարություն ձևավորել։ Ընդ որում, հիմնական դաշինքներից ոչ մեկը դեռ չունի բավարար աջակցություն՝ ինքնուրույն խորհրդարանական մեծամասնություն ստանալու համար։

Առանձին գործոն են դարձել արաբական կուսակցությունների արդյունքները. նախնական գնահատականներով՝ նրանք միասին կարող են ստանալ ռեկորդային 19 տեղ։ Տեսականորեն նրանց աջակցությունը կարող էր ամրապնդել ընդդիմության դիրքերը, սակայն արաբական կուսակցությունների մասնակցությամբ կամ նրանց անմիջական աջակցությամբ Այզենկոտի կոալիցիայի ձևավորումը քիչ հավանական է համարվում։

ԱՄՆ նախագահ Դոնալդ Թրամփը Axios-ին ասել է, որ իր աջակցությունն օգնել է Նեթանյահուին ընտրություններում։ Ամերիկացի առաջնորդի գնահատմամբ՝ Իսրայելի վարչապետն այժմ «բավական լավ դիրքերում է»։ Սակայն նրա քաղաքական դաշինքի համար նույնիսկ բարենպաստ արդյունքը չի վերացնում գլխավոր խնդիրը՝ երաշխավորված խորհրդարանական մեծամասնության բացակայությունը։

Ընդդիմությունն իր հերթին կարող է առանցքային պաշտոններ ստանալ Քնեսեթում և դրանք օգտագործել՝ առաջ մղելու անվտանգության համակարգի այն ձախողումների քննությունը, որոնք նախորդել են 2023 թվականի հոկտեմբերի 7-ին Իսրայելի վրա ՀԱՄԱՍ-ի հարձակմանը։ Ուստի, նույնիսկ առանց նոր կառավարություն ձևավորելու, Նեթանյահուի ընդդիմախոսները պահպանում են քաղաքական օրակարգի վրա ազդելու և տեղի ունեցածի համար պատասխանատվության հարցի քննությանը հասնելու հնարավորությունները։