Իրանի Իսլամական հեղափոխության պահապանների կորպուսը (ԻՀՊԿ) հայտնել է երկու լցանավերում բռնկված հրդեհների մասին այն բանից հետո, երբ դրանք փորձել են անցնել Հորմուզի նեղուցով Թեհրանի կողմից չարտոնված երթուղով, հաղորդել է Tasnim գործակալությունը։

«Այս երկու լցանավերն անջատել են իրենց բոլոր նավիգացիոն և նույնականացման համակարգերը և փորձել են անցնել ԱՄՆ ագրեսիվ և ահաբեկչական տրամադրվածություն ունեցող զինված ուժերի աջակցությամբ», - նշվել է ԻՀՊԿ հայտարարության մեջ։

Նշվել է նաև, որ «ականների վրա պայթելուց հետո դրանք բռնկվել են և կանգնեցվել»։

ԻՀՊԿ-ն կրկին հայտարարել է, որ կենսական նշանակություն ունեցող ջրային ուղին մնում է փակ, և «ոչ մի փոփոխություն չի լինի, քանի դեռ չեն կատարվել ԱՄՆ-ին առաջարկված իրանական յոթ պայմանները»։ Հայտարարության մեջ նաև նշվել է, որ ամերիկացի զինվորականների՝ «լցանավերին չարտոնված և ականապատ տարածքներով անցնել ստիպելու» փորձերը «կհանգեցնեն միայն կրկնվող խայտառակ ձախողումների»։