նախընտրելի դարձնել
Ամերիկացիների 71%-ը ցանկանում է, որ ԱՄՆ նոր Կոնգրեսը հասնի Իրանի հետ պատերազմի դադարեցմանը, իսկ 62%-ը կողմ է նախագահ Դոնալդ Թրամփի սահմանած մաքսատուրքերի չեղարկմանը։ Դրա մասին են վկայում նոյեմբերի 10-ին հրապարակված Reuters/Ipsos-ի հարցման արդյունքները։
Ըստ հետազոտության՝ Իրանի հետ պատերազմը դադարեցնելու մասին օրինագծին աջակցում է Դեմոկրատական կուսակցության կողմնակիցների 93%-ը և հանրապետականների 51%-ը։ Փետրվարին ԱՄՆ-ի՝ Իսրայելի հետ համատեղ սկսած ռազմական հակամարտությունը հանգեցրել է վառելիքի գների կտրուկ աճի և ուժեղացրել ԱՄՆ տնտեսության վրա գնաճային ճնշումը։
Թրամփի վարչակազմի սահմանած ներմուծման մաքսատուրքերի չեղարկմանը կողմ է արտահայտվել հարցվածների 62%-ը։ Նախագահը պնդում է, որ մաքսատուրքերը պաշտպանում են ամերիկյան արդյունաբերությունը էժան ներմուծումից և նպաստում տեղական արտադրության զարգացմանը։ Սակայն առևտրային նոր սահմանափակումները, ինչպես և Իրանի հետ պատերազմը, մեծացրել են ամերիկացիների մտահոգությունը կյանքի թանկացման առնչությամբ։
Հարցումն անցկացվել է չորս օրվա ընթացքում և ավարտվել երկուշաբթի։ Դրա արդյունքները հրապարակվել են Կոնգրեսի միջանկյալ ընտրություններից հետո, որոնց արդյունքում դեմոկրատները Սենատում և Ներկայացուցիչների պալատում ստացել են 2008 թվականից ի վեր ամենամեծ մեծամասնությունը։ Կուսակցությունը նոր լիազորություններ կստանա հունվարի 3-ին՝ Կոնգրեսի նոր կազմի երդմնակալությունից հետո։
Կյանքի թանկացման խնդիրը շարունակում է գլխավոր առաջնահերթությունը մնալ ընտրողների համար․ հարցման յուրաքանչյուր տասը մասնակցից ինը կարծում է, որ Կոնգրեսն իր աշխատանքի առաջին 100 օրերին պետք է կենտրոնանա այդ խնդրի վրա։ Դեմոկրատները խոստացել են հասնել պատերազմի դադարեցմանը և մաքսատուրքերի չեղարկմանը, թեև կուսակցության ներսում մի շարք հարցերի շուրջ տարաձայնությունները պահպանվում են։
Ամերիկացիների մեծամասնությունը նաև կարևոր է համարում, որ Թրամփը համագործակցի դեմոկրատների հետ, իսկ Դեմոկրատական կուսակցության ղեկավարությունը նախագահի հետ փոխգործակցության հնարավորություններ փնտրի։
Միևնույն ժամանակ Թրամփին իմփիչմենթի ենթարկելու գաղափարը միանշանակ աջակցություն չի վայելում։ Հարցման տվյալներով՝ հարցվածների 42%-ը կարծում է, որ նախագահին իմփիչմենթի ենթարկելու փորձը կվնասի երկրին, մինչդեռ 33%-ի կարծիքով՝ դա օգուտ կբերի երկրին։ Մյուսները դժվարացել են պատասխանել կամ կարծիք չեն հայտնել։
Թրամփի գործունեության հավանության վարկանիշը կազմում է 32%՝ մոտենալով նրա քաղաքական կարիերայի ընթացքում գրանցված ամենացածր ցուցանիշներից մեկին։ Սակայն դեմոկրատները ևս հանրային լայն աջակցություն չեն վայելում․ կուսակցության նկատմամբ դրական վերաբերմունք ունի ամերիկացիների 45%-ը, բացասական՝ 51%-ը։ Հանրապետականներին դրական է գնահատում հարցվածների 35%-ը, բացասական՝ 60%-ը։
Reuters/Ipsos-ի համազգային առցանց հարցմանը մասնակցել է ԱՄՆ 1705 չափահաս բնակիչ։ Սխալի սահմանը մոտ երկու տոկոսային կետ է։
