Եվրոպական բորսաները երեքշաբթի փակվել են աճով, նվազել է միայն Բրիտանիայի ցուցիչը

Եվրոպական ֆոնդային ինդեքսները երեքշաբթի օրվա առևտրային նստաշրջանն ավարտել են աճով՝ բացառությամբ բրիտանական FTSE 100-ի։ Շուկաներում դրական տրամադրություններին նպաստել է նավթի գների նվազումը։

Տարածաշրջանի խոշորագույն ընկերություններն ընդգրկող Stoxx Europe 600 ինդեքսն աճել է 0,3%-ով՝ հասնելով 658,32 կետի։ Գերմանական DAX-ն ավելացել է 0,3%-ով, ֆրանսիական CAC 40-ը՝ 0,6%-ով, իտալական FTSE MIB-ը՝ 0,7%-ով, իսկ իսպանական IBEX 35-ը՝ 1%-ով։ Բրիտանական FTSE 100-ը նվազել է 0,3%-ով։

Համաշխարհային շուկաներում ռիսկի դիմելու ներդրողների պատրաստակամությունն աճել է նավթի գների նվազման ֆոնին։ Էժանացումը պայմանավորված էր իրանական հարցի կարգավորման շուրջ բանակցություններում դրական տեղաշարժի մասին ազդակներով։ Brent տեսակի նավթի գինն օգոստոսից ի վեր առաջին անգամ իջել է մեկ բարելի դիմաց 90 դոլարից ցածր։

Այս ֆոնին նվազել են նավթային ընկերությունների բաժնետոմսերի գները․ Shell-ինը՝ 2%-ով, Eni-ինը՝ 0,9%-ով, BP Plc-ինը՝ 0,8%-ով, իսկ TotalEnergies-ինը՝ 0,7%-ով։

Stoxx Europe 600 ինդեքսում աճի առաջատարը դարձել է վճարային ծառայությունների ֆրանսիական օպերատոր Edenred-ը, որի բաժնետոմսերը թանկացել են 6,4%-ով։ Ամենամեծ անկումը գրանցել է բրիտանական հանքարդյունաբերական Hochschild Mining ընկերությունը՝ 7,2%։

Գերմանական Henkel-ի շուկայական արժեքն աճել է 4,4%-ով։ Կենցաղային քիմիայի և կոսմետիկայի արտադրողի հասույթը երրորդ եռամսյակում ավելացել է 11%-ով՝ գերազանցելով շուկայի սպասումները։

Բրիտանական Marks & Spencer հանրախանութների ցանցի կապիտալիզացիան աճել է 4,1%-ով։ Ընկերությունը հայտարարել է միջնաժամկետ հեռանկարում հասույթի տարեկան աճի տեմպը 4–9%-ի հասցնելու մտադրության մասին։

Վերջին զանգվածային վաճառքների հետևանքով զգալիորեն էժանացած տեխնոլոգիական ընկերությունների բաժնետոմսերը երեքշաբթի թանկացել են՝ ներդրողների համար դրանց գրավչության բարձրացման շնորհիվ։ BE Semiconductor-ի բաժնետոմսերի գնանշումներն աճել են 2,6%-ով, STMicroelectronics-ինը՝ 1,3%-ով, ASM International-ինը՝ 1,1%-ով, իսկ ASML Holding-ինը՝ 0,9%-ով՝ առանձին առևտրային հարթակներում գրանցելով նաև 1,3% աճ։

Infineon Technologies-ի բաժնետոմսերի արժեքն ավելացել է 0,9%-ով։ Կիսահաղորդչային արտադրանք թողարկող գերմանական ընկերությունը 2026 ֆինանսական տարվա չորրորդ եռամսյակում զուտ շահույթն ավելացրել է 2,3 անգամ, իսկ հասույթը՝ 19%-ով։ Ընկերությունը 2027 ֆինանսական տարում ևս ակնկալում է հասույթի աճ՝ իր արտադրանքի նկատմամբ բարձր պահանջարկի շնորհիվ, մասնավորապես՝ տվյալների կենտրոնների կողմից։

Աճ են գրանցել նաև պաշտպանական ոլորտի կապալառուների բաժնետոմսերը․ Safran-ինը՝ 2,3%-ով, Leonardo-ինը՝ 2,2%-ով, Thales-ինը՝ 1,8%-ով, Rheinmetall-ինը՝ 0,9%-ով, Rolls-Royce-ինը՝ 0,8%-ով, իսկ BAE Systems-ինը՝ 0,6%-ով։

Vodafone Group-ի կապիտալիզացիան կրճատվել է 1%-ով։ Բջջային կապի բրիտանական օպերատորը միանվագ դուրսգրումների պատճառով 2027 ֆինանսական տարվա առաջին կիսամյակում զուտ վնաս է արձանագրել։ Միաժամանակ ընկերությունը բարելավել է ճշգրտված EBITDAaL-ի՝ լիզինգի ծախսերից հետո, բայց մինչև տոկոսների, հարկերի, մաշվածության և ամորտիզացիայի հաշվարկը շահույթի տարեկան կանխատեսումը։

Volkswagen-ում և Porsche AG-ում խոշոր մասնաբաժիններ ունեցող Porsche Automobil Holding SE հոլդինգի բաժնետոմսերի գինը նվազել է 3,5%-ով։ Ընկերությունը հունվար–սեպտեմբեր ամիսներին զուտ վնաս և ճշգրտված շահույթի կտրուկ կրճատում է գրանցել՝ գերմանական ավտոարտադրողներում իր ներդրումների զգալի արժեզրկման պատճառով։