նախընտրելի դարձնել
Նոյեմբերի 11-ին Երևանում՝ խորհրդարանի ֆինանսավարկային և բյուջետային հարցերի մշտական հանձնաժողովի նիստի մեկնարկից առաջ, հանձնաժողովի նախագահ, ընդդիմադիր «Ուժեղ Հայաստան» խմբակցության պատգամավոր Լիանա Մանուկյանն առաջարկել է մեկ րոպե լռությամբ հարգել իրենց քաղաքական ուժի անդամ, գործարար և Ստեփանավան խոշորացված համայնքի ղեկավարի թեկնածու Արսեն Գևորգյանի հիշատակը։
Մանուկյանը Գևորգյանին անվանել է քաղբանտարկյալ։ Գործարարը նախորդ օրը մահացել էր «Նուբարաշեն» քրեակատարողական հիմնարկում։
Բոլոր պատգամավորները, այդ թվում՝ իշխող «Քաղաքացիական պայմանագիր» կուսակցության ներկայացուցիչները, ոտքի են կանգնել և մեկ րոպե լռությամբ հարգել հանգուցյալի հիշատակը։
Սակայն «Քաղաքացիական պայմանագիր» խմբակցության պատգամավոր Ծովինար Վարդանյանն առարկել է Լիանա Մանուկյանի հնչեցրած գնահատականին՝ հայտարարելով.
«Ցավակցություն եմ հայտնում հանգուցյալի ընտանիքին և հարազատներին։ Բայց, այնուամենայնիվ, կարծում եմ, որ այս հարցը քաղաքականացնելը սխալ է։ Հարգանքի տուրք մատուցելով, այսինքն՝ մեկ րոպե լռությամբ հարգելով մահացածի հիշատակը, ես, չնայած հնչած այն պնդմանը, թե նա քաղբանտարկյալ էր, շատ ավելի մեծ դաստիարակվածություն և նրբանկատություն եմ ցուցաբերում, քան դուք՝ ձեր գործընկերոջ նկատմամբ՝ փորձելով քաղաքականացնել այս հարցը։ Դուք կարող էիք պարզապես նշել նրա անունն ու ազգանունը»։
Ի պատասխան՝ Լիանա Մանուկյանը հայտարարել է.
«Ինչ վերաբերում է գնահատականներին, կարծում եմ՝ ժամանակի ընթացքում մենք բոլորս դրանում կհամոզվենք»։
