նախընտրելի դարձնելԵվրոպական երկրները պետք է միջոցներ ձեռնարկեն «իրեն կորցրած Թուրքիային» սանձելու համար: Այդ մասին հայտարարել է Իսրայելի ԱԳ նախարար Ավիգդոր Լիբերմանը` խոսելով «Մավի Մարմարա» նավի գրավման գործով իսրայելցի գեներալների դեմ ներկայացված մեղադրական եզրակացության մասին:
Լիբերմանը հայտարարել է, որ թուրքական կողմը խախտում է միջազգային իրավունքի բոլոր նորմերը: Ընդ որում, Իսրայելն իրեն զուսպ է պահում եւ չի արձագանքում թուրքական կողմի հարձակումներին: Սակայն, նշել է նախարարը, զսպվածությունը դեռեւս չի խոսում այն մասին, որ իսրայելական ղեկավարությունը թույլ կտա սպառնալ իրենց առաջադրանքը կատարող զինվորներին եւ սպաներին, հայտնում է NEWSru.co.il-ը:
Լիբերմանն ընդգծել է, որ Իսրայելը չի զիջի սադրանքներին հանուն տարածաշրջանում կայունությունը պահպանելու:
Ինչպես ավելի վաղ հայտնել էր NEWS.am-ը, թուրքական դատարանը իսրայելցի բարձրաստիճան 4 պաշտոնյաների դեմ հայցին ընթացք է տվել, որոնք հրահանգներ էին տվել «Ազատության նավատորմ» գործողության ընթացքում: Իսրայելցիներին կանխամտածված սպանության մեղադրանքներ են ներկայացվել:
Մեղադրանքներ են ներկայացվել ՑԱԽԱԼ-ի գլխավոր գրասենյակի նախկին ղեկավար Գաբի Աշքենազիին, Իսրայելի ռազմածովային ուժերի նախկին հրամանատար Էլիէզեր Մարոմին, ռազմական հետախուզության նախկին ղեկավար Ամոս Յադլինին, ռազմաօդային ուժերի հետախուզության նախկին ղեկավար Ավիշայ Լեւիին: Մեղադրյալներից յուրաքանչյուրին սպառնում է 18032 տարվա ազատազրկում:
«Ազատության նավատորմը» Իսրայելի ռազմածովային ուժերը զավթել էին Միջերկրական ծովում` 2010 թվականի մայիսի 31-ի գիշերը: Գործողության ընթացքում զոհվել էին Թուրքիայի 9 քաղաքացիներ, տասնյակ մարդիկ վիրավորվել էին, հարյուրավորները հայտնվել ճաղերի հետեւում եւ ավելի ուշ արտաքսվել: Վնասվածքներ էին ստացել նաեւ իսրայելցի 7 հրամանատարներ:
