նախընտրելի դարձնել
Իսրայելի Քնեսեթը 63 կողմ և 50 դեմ ձայնով հավանություն է տվել խորհրդարանի աշխատանքների կազմակերպման հանձնաժողովի ստեղծմանը՝ 22 պատգամավորի կազմով։ Հանձնաժողովի նախագահ կդառնա «Յաշար» կուսակցության պատգամավոր Ռոյ Ֆոլկմանը, որն առաջարկել է հանձնաժողովի կազմը, հայտնում է The Times of Israel-ը։
Հաստատված բաշխմամբ՝ ինը տեղ կստանա «Յաշարի» առաջնորդ Գադի Այզենկոտի գլխավորած դաշինքը, ինը՝ վարչապետ Բինյամին Նեթանյահուին աջակցող դաշինքը, ևս չորսը՝ արաբական «Միասնական ցուցակ» և ՌԱԱՄ կուսակցությունները։
Ֆոլկմանի առաջարկով՝ խմբակցությունները հանձնաժողովում մեկական տեղ են ստանում յուրաքանչյուր հինգ պատգամավորական մանդատի դիմաց։ Այսպիսով, «Լիկուդը» կստանա հինգ տեղ, «Յաշարը»՝ չորս, իսկ «Բեյախադ», «Միասնական ցուցակ», «Դեմոկրատներ» և ՌԱԱՄ կուսակցությունները՝ երկուական տեղ։ «Մեր տուն Իսրայել», «Օցմա Յեհուդիտ», «Թորայի միացյալ հուդայականություն», ՇԱՍ և «Կրոնական սիոնիզմ» կուսակցություններից յուրաքանչյուրը ներկայացված կլինի մեկ պատգամավորով։
Տեղերի բաշխումը մեծ նշանակություն ունի, քանի որ Քնեսեթի աշխատանքների կազմակերպման հանձնաժողովը մշտական խորհրդարանական հանձնաժողովների ձևավորման ընթացքում լայն լիազորություններ ունի։ Այն որոշում է դրանց կազմը, որն այնուհետև ներկայացվում է պատգամավորների հաստատմանը, ինչպես նաև կարող է ստեղծել ժամանակավոր ֆինանսական և արտաքին գործերի ու պաշտպանության հանձնաժողովներ։ Մինչև Քնեսեթի հարցերով հանձնաժողովի ընտրությունը՝ հանձնաժողովը զբաղվում է նաև խորհրդարանական ընթացակարգերով ու կազմակերպչական հարցերով, ինչպես նաև կարող է նշանակել խորհրդարանի խոսնակի ժամանակավոր տեղակալներ։
«Լիկուդի» պատգամավոր Օֆիր Կացն առաջարկել էր յուրաքանչյուր խմբակցությանը տրամադրել մեկական ներկայացուցիչ յուրաքանչյուր չորս պատգամավորական մանդատի դիմաց։ Այդ մոտեցման դեպքում Նեթանյահուին աջակցող դաշինքը կստանար 15 տեղ, վարչապետի հակառակորդների դաշինքը՝ 12, իսկ արաբական խմբակցությունները՝ չորս։ Սակայն առաջարկը մերժվել է, քանի որ համարվել է, որ այն չափազանց մեծացնում է հանձնաժողովի կազմը։
Այնուհետև Կացն առաջարկել է իր դաշինքին տրամադրել ութ տեղ, Այզենկոտի դաշինքին՝ յոթ, իսկ արաբական կուսակցություններին՝ երեք։ Քննադատներն առարկել են՝ նշելով, որ նման բաշխումը խտրական և հակաժողովրդավարական բնույթ ունի ու առավելություն կապահովեր Նեթանյահուի կողմնակիցներին։
«Սա արդար առաջարկ էր, բայց նրանք հրաժարվեցին, քանի որ փորձում են թաքցնել Քնեսեթում ահաբեկչության աջակիցների հետ իրենց համագործակցությունը»,- հայտարարել է Կացը լիագումար նիստում։
«Պարկեշտությունը հնարավոր չէ օրենքով սահմանել, բայց կան նորմեր և օրենքներ»,- պատասխանել է Ֆոլկմանը։ Նա հավելել է, որ փորձել է համաձայնության գալ Կացի հետ, սակայն վերջինս չի համաձայնել փոխզիջման գալ։
