նախընտրելի դարձնելՊեկինում՝ Չինաստանի ազգային օպերային թատրոնի (China National Opera House) վեհաշուք դահլիճում, հնչել են հայկական դասական երաժշտության գլուխգործոցներ․ այստեղ ամփոփվել են Արամ Խաչատրյանի անվան պատանեկան միջազգային մրցույթի արդյունքները։
Գլխավոր բեմահարթակը համախմբել է մոլորակի տարբեր անկյուններից ժամանած երիտասարդ տաղանդավոր երաժիշտների՝ խաչատրյանական ժառանգությունը վերածելով մշակույթների երկխոսության հարթակի։
Ինչպես NEWS.am-ի թղթակցի հետ զրույցում նշել է Չինաստանում Հայաստանի արտակարգ և լիազոր դեսպան Վահագն Գևորգյանը, մրցույթը երիտասարդ կատարողներին հնարավորություն է տալիս բացահայտելու իրենց ներուժը միջազգային մակարդակում։ «Արամ Խաչատրյանի անվան պատանեկան մրցույթն անցկացվում է բացառապես Չինաստանում, և դա հիանալի հնարավորություն է Հայաստանի, Չինաստանի և այլ երկրների երիտասարդների համար՝ դրսևորելու իրենց տաղանդն ու մուտք գործելու երաժշտական մեծ աշխարհ։ Այդ տեսանկյունից մրցույթը եզակի է։ Այն մասնակիցներին հնարավորություն է տալիս շփվելու միմյանց հետ, համագործակցելու համաշխարհային երաժշտական հանրության հետ և փաստացի մշակութային կամուրջ է ծառայում ոչ միայն Հայաստանի և Չինաստանի, այլև մեր երկրների ու ամբողջ աշխարհի միջև»,- ընդգծել է դեսպանը։
Նա նաև ուշադրություն է հրավիրել այն հանգամանքի վրա, որ այս լայնածավալ նախագիծը վաղուց դուրս է եկել երկկողմ ձևաչափի շրջանակից։
«Միջոցառումն իսկապես միջազգային նշանակություն ունի։ Սա հիանալի օրինակ է, թե ինչպես կարող են մշակույթի ոլորտում երկկողմ հարաբերությունները բարձրանալ միջազգային բարձր մակարդակի և դառնալ համաշխարհային մասշտաբի իրադարձություն՝ տվյալ դեպքում դասական երաժշտության բնագավառում»,- հավելել է Վահագն Գևորգյանը։
Հանդիսավոր երեկոյի իսկական զարդը դարձել է Հայաստանի պետական սիմֆոնիկ նվագախմբի ելույթը, որը հանդիսատեսին անմոռանալի տպավորություններ է պարգևել խաչատրյանական և համաշխարհային դասական ստեղծագործությունների կատարմամբ։
Դիանա Առուշանյան, Պեկին
