նախընտրելի դարձնել
Գրաֆիկական պրոցեսորներ արտադրող Nvidia ընկերության բաժնետոմսերն ԱՄՆ-ում հիմնական առևտրային նստաշրջանի ավարտից հետո էժանանում են ավելի քան 7%-ով: Այս մասին հայտնի է բորսայական տվյալներից։ Անկումը հաջորդել է The Wall Street Journal-ի հրապարակմանը, ըստ որի՝ ընկերության տնօրենների խորհուրդը կարող է պաշտոնից հեռացնել գլխավոր տնօրեն Ջենսեն Հուանգին։
Մոսկվայի ժամանակով ժամը 01:52-ի դրությամբ Nvidia-ի բաժնետոմսերի գինը նվազել էր 7,38%-ով՝ կազմելով 160,9 դոլար։ Մինչդեռ չորեքշաբթի օրվա հիմնական առևտրային նստաշրջանը բաժնետոմսերն ավարտել էին 2,87% աճով՝ հասնելով 173,73 դոլարի։
Ըստ The Wall Street Journal-ի աղբյուրների՝ Nvidia-ի տնօրենների խորհուրդը կարող է ընկերության հիմնադիր և գլխավոր տնօրեն Ջենսեն Հուանգին պաշտոնից հեռացնել արդեն չորեքշաբթի օրը։
Ավելի վաղ The New York Times-ը գրել էր, որ գործարար Էլիս Հուանգը մտերիմ հարաբերություններ է ունեցել Nvidia-ի ղեկավարի հետ և միաժամանակ տեղեկություններ փոխանցել Չինաստանի պետական կառույցներին։ Պարբերականի հաղորդմամբ՝ Ջենսեն Հուանգն ընդունել է արտամուսնական կապ ունենալու փաստը, իսկ ընկերությունը հայտարարել է անկախ հետաքննություն սկսելու մասին։
Nvidia-ն հիմնադրվել է 1993 թվականին։ Գրաֆիկական պրոցեսորների արտադրությունից բացի՝ ընկերությունը զբաղվում է նաև արհեստական բանականության ոլորտում տեխնոլոգիաների մշակմամբ։ Նրա գլխավոր գրասենյակը գտնվում է Կալիֆոռնիայի Սանտա Կլարա քաղաքում։
