Հայկական «Hecttor AI» տեխնոլոգիական ընկերությունը նոր էջ է բացում ձայնային արհեստական բանականության համաշխարհային շուկայում՝ գրանցելով աննախադեպ հաջողություններ իրական ժամանակում խոսքի արագության կարգավորման և հստակության բարելավման աշխարհում առաջին գործիքի շնորհիվ։

Ընկերության մշակած ձայնային համակարգն արդեն իսկ հաջողությամբ կիրառվում է աշխարհի ավելի քան 30 երկրում՝ սպասարկման ու զանգերի կենտրոններից մինչև արտակարգ իրավիճակների արձագանքման ծառայություններ։ Լինելով խորը տեխնոլոգիական ընկերություն՝ «Hecttor»-ը մշակում է սեփական ձայնային համակարգեր, որոնք հիմնված են հիմնարար հետազոտությունների վրա և պաշտպանված են ԱՄՆ-ի արտոնագրային գրասենյակի (USPTO) մի շարք արտոնագրերով։ Ի տարբերություն վերահսկվող միջավայրերի համար նախատեսված սովորական լուծումների՝ ընկերության տեխնոլոգիաները ստեղծված են կենդանի, իրական աշխարհի պայմանների համար՝ հաղթահարելով խոսքի արագության, աղմուկի, տարբեր լեզուների և առոգանությունների հետ կապված մարտահրավերները։

Այս ինտեգրված համակարգերը կարողանում են վեր հանել անգամ թույլ լսելի կամ խլացված խոսքը՝ այն դարձնելով պարզ և հստակ՝ առանց ձայնի աղավաղման կամ կողմնակի աղմուկի ուժեղացման։

NEWS.am-ի գիտահանրամատչելի «Բա իմացա՞ր» ալիքի EXPERT հաղորդման շրջանակում «Hecttor AI»-ի հիմնադիր և գլխավոր գործադիր տնօրեն, տվյալագետ Մնացական Շարաֆյանը խոսել է ընկերության ստեղծման գաղափարի, արձանագրած հաջողությունների, միջազգային շուկայի պահանջների և այն մասին, թե ինչպես է արհեստական բանականությունը փոխում մարդկանց և համակարգերի միջև հաղորդակցությունը։ Մանրամասները՝ տեսանյութում։