Վիեննայում Իրանի ներկայացուցչությունը Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսսիին մեղադրել է Թեհրանի դեմ ուղղված «տեխնիկապես և իրավաբանորեն անհիմն» բանաձևերի վրա հենվելու մեջ։ Ներկայացուցչությունը նաև հայտարարել է, որ Իրանի միջուկային օբյեկտներին ԱՄՆ-ի և Իսրայելի հարվածներն անհնար են դարձրել սովորական տեսչական ստուգումների անցկացումը։

Հայտարարությունն արվել է այն բանից մեկ օր անց, երբ ԱԷՄԳ-ն Իրանին կոչ էր արել վերականգնել իր տեսուչների մուտքը միջուկային օբյեկտներ։ Գործակալությունը համապատասխան զեկույցը տարածել էր անդամ պետությունների շրջանում՝ ընդգծելով, որ տեսուչների մուտքն անհրաժեշտ է Իրանի միջուկային ծրագրի վերահսկման իր մանդատն իրականացնելու համար։

X սոցիալական ցանցում հրապարակված հայտարարության մեջ Իրանի ներկայացուցչությունը նշել է, որ երկրի միջուկային օբյեկտներին հասցված հարվածները ստեղծել են «աննախադեպ հանգամանքներ», խաթարել տեսչական ստուգումների անցկացումը և գործակալությանը ստիպել հետ կանչել իր տեսուչներին։

Ներկայացուցչությունը վկայակոչել է Գրոսսիի այն ընդունումը, որ տեսչական գործունեությունը խաթարվել է, և ընդգծել, որ Իրանի անվտանգությանն առնչվող մտահոգությունները պետք է փարատվեն մինչև ԱԷՄԳ-ի երաշխիքների լիարժեք կիրառման վերսկսումը։

«Երաշխիքների լիարժեք կիրառումը չի կարող և չի վերսկսվի ոչ բնականոն պայմաններում», — ասվում է հայտարարության մեջ։

Իրանի ներկայացուցչությունը ԱԷՄԳ-ի կառավարիչների խորհրդին կոչ է արել զբաղվել այն խնդիրների վերացմամբ, որոնք Թեհրանն անվանել է ներկայիս ճգնաժամի արմատական պատճառներ։