Հնագետները և արվեստի պատմության մասնագետները վերականգնել են Հռոմի կայսր Անտոնինոս Պիոսի կոթողային արձանի տեսքը, որը մի ժամանակ վեր էր խոյանում ներկայիս Շոտլանդիայի տարածքում, գրել է Live Science-ը։

Քանդակից պահպանվել է միայն աջ սրունքը՝ ոտնաթաթով, որը պատված է ոսկով։ Գիտնականները պարզել են, թե ինչ տեսք կարող էր ունենալ ամբողջ արձանը, սակայն մինչ այժմ չգիտեն, թե ինչու է այն ավելի քան 1 800 տարի առաջ խնամքով ապամոնտաժվել։

Ոսկեզօծ բրոնզե բեկորը, որը հայտնի է որպես Միլսինգթոնի ոտք, հայտնաբերվել է տորֆաճահճում 1820 թվականին։ Այս մասին նոյեմբերի 12-ին հայտնել են Շոտլանդիայի ազգային թանգարանները։ Սա երկրի տարածքում հայտնաբերված՝ հռոմեական կայսեր կոթողային արձանի միակ հայտնի նմուշն է։

Ենթադրվում է, որ քանդակը պատրաստվել է մ.թ. մոտ 140 թվականին՝ Անտոնինոս Պիոսի օրոք, որը հռոմեական գահը զբաղեցրել է 138–161 թվականներին։ Նրա կառավարման տարիները կայսրության համար հարաբերական կայունության շրջան էին։ Բրիտանիայում կայսրը շարունակել է հռոմեական ներկայության ընդլայնումը դեպի հյուսիս. մոտ 142 թվականին հռոմեացիները Շոտլանդիայում սկսել են պաշտպանական կառույցի շինարարությունը, որը հայտնի է որպես Անտոնինոսի պարիսպ։

Արձանի պահպանված հատվածը վկայում է դրա տպավորիչ չափերի և կատարման բարձր որակի մասին։ Բրոնզե մակերեսը պատված էր ոսկով, ինչի շնորհիվ քանդակը պետք է առանձնապես տպավորիչ տեսք ունենար։

Սակայն արձանի ճակատագիրը առեղծված է մնում։ Այն ոչ թե պարզապես վնասվել է, այլ ապամոնտաժվել, ընդ որում՝ այդ գործընթացի հանգամանքները դեռ պարզված չեն։ Հայտնի չէ՝ դա կապված է եղել քաղաքական փոփոխությունների, կայսեր պատկերի միտումնավոր ոչնչացման, թե այլ պատճառների հետ։

Վերականգնումը թույլ է տալիս պատկերացում կազմել Բրիտանիայի հյուսիսային մասում հռոմեական կոթողային արվեստի մասշտաբների մասին և հետազոտողներին հնարավորություն է տալիս ավելի լավ հասկանալ, թե Հռոմն ինչպես էր ցուցադրում իր իշխանությունը կայսրության հեռավոր տարածքներում։ Այնուամենայնիվ, գիտնականները դեռ պետք է բացատրեն, թե ինչու երբեմնի վեհաշուք ոսկեզօծ արձանից պահպանվել է միայն ոտքի մի հատվածը։