Ֆրանսիայի կառավարությունը մինչև նոյեմբերի 27-ն արգելել է F2 և F3 կարգերի պիրոտեխնիկական միջոցների վաճառքը, որոնք օգտագործվել են բողոքի ցույցերի և իրավապահների ու դպրոցների աշխատակիցների վրա հարձակումների ժամանակ։ Համապատասխան հրամանագիրը նոյեմբերի 15-ին հրապարակվել է կառավարության պաշտոնական տեղեկագրում, հայտնում է BFMTV-ն։

Որոշումն ընդունվել է ավագ դասարանների աշակերտների բողոքի ցույցերի և կյանքի թանկացման դեմ ակցիաների ընթացքում տեղի ունեցած մի շարք միջադեպերից հետո։ Վերջին օրերին պիրոտեխնիկական միջոցներ են արձակվել ոստիկանների, ուսուցիչների և աշակերտների ուղղությամբ, այդ թվում՝ անմիջապես դպրոցների շենքերի ներսում։ Արդյունքում մի քանի մարդ վիրավորվել է։

«Այս սարքերն այլևս չեն օգտագործվում տոնակատարությունների համար. դրանցով վնասվածքներ են պատճառում։ Ցույցեր անցկացնելու իրավունքը երաշխավորված է, բայց վնաս պատճառելու իրավունք գոյություն չունի», — հայտարարել է կառավարության ներկայացուցիչը։

Նա նշել է, որ դպրոցների մոտ, իսկ երբեմն նաև դրանց ներսում, պիրոտեխնիկական միջոցներ են արձակում մարդու հասակի բարձրությամբ՝ ոստիկանների, ժանդարմների, կրթության ոլորտի աշխատակիցների և հենց աշակերտների ուղղությամբ։

Արգելքը տարածվում է F2 և F3 արտադրանքի վրա։ Մասնագիտական օգտագործման համար նախատեսված F4 կարգի պիրոտեխնիկան շարունակում է հասանելի մնալ մասնագետներին։

Նախկինում նման արտադրանքը թույլատրվում էր վաճառել լիցենզավորված խանութներում կամ հատուկ թույլտվության առկայության դեպքում, սակայն հանրային վայրերում դրա օգտագործումը խստիվ արգելված էր։

Նոյեմբերի սկզբին Վալ դ’Ուազ դեպարտամենտում տուժել էին ուսուցչուհին, դաստիարակչական աշխատանքների գծով օգնականը, դպրոցի տնօրենն ու ուսումնական հաստատության ևս մեկ աշխատակից։

Վերջին օրերին մի քանի լիցեյներում պիրոտեխնիկական սարքեր կիրառելու նոր դեպքեր են գրանցվել, այդ թվում՝ այն ուսումնական հաստատություններում, որտեղ միջադեպերից հետո մեկուսացման ռեժիմ էր սահմանվել կամ ժամանակավորապես դադարեցվել էին դասերը։

Բռնության հաճախացած դեպքերի ֆոնին կառավարությունը նաև նախազգուշացրել է կրթության ոլորտի աշխատակիցների վրա հարձակվողների նկատմամբ հնարավոր քրեական պատժամիջոցների մասին։

Շաբաթ օրը՝ նոյեմբերի 14-ին, Ֆրանսիայում նոր ցույցեր են անցկացվել կյանքի թանկացման, ուժայինների կողմից զենքի կիրառման իրավաչափության կանխավարկածի մասին օրենսդրական նախաձեռնության և դպրոցների անբավարար ֆինանսավորման դեմ։ Հաջորդ ակցիան նախատեսված է երեքշաբթի։