Նոյեմբերի 17-ի գիշերը հասցված հարվածից հետո մասամբ փլուզվել է ուշ շրջանի «պուտինիզմի» խորհրդանիշ դարձած և ավելի քան 200 մլրդ ռուբլի արժեցած Ղրիմի կամուրջը։

Մշտադիտարկման ալիքների հրապարակած լուսանկարների և տեսանյութերի համաձայն՝ 19 կիլոմետրանոց կամրջի ավտոմոբիլային հատվածում, որը նախատեսված է տարեկան 40 հազար մեքենայի թողունակության համար, ամբողջությամբ բացակայում է 227 մետրանոց կամարը։ Երկուշաբթի մոտ 5 հազար տոննա կշռող և 15-հարկանի շենքի բարձրություն ունեցող կառույցը թեքվել էր ԱԹՍ-ների հարձակումից հետո։ Իշխանությունները դադարեցրել էին կամրջով երթևեկությունը, ապա այն վերսկսել միայն մեկ ուղղությամբ՝ հերթափոխով։

Կրկնակի հարվածից հետո արված լուսանկարներում երևում է, որ կամարը փլուզվել է, իսկ բեկորները հայտնվել են Կերչի նեղուցում։ Ջրում է հայտնվել նաև ճանապարհածածկի մի մասը։ Հարակից երկաթուղային կամարը կանգուն է մնացել, սակայն նույնպես կարող էր վնասվել։ Իշխանությունները հայտարարել են կամրջով երկաթուղային երթևեկության դադարեցման մասին։

Z-ալիքների հաղորդմամբ՝ կամրջին հարվածները հասցվել են 4–5 րոպե ընդմիջումներով։ Դրանք ենթադրում են, որ հարվածները կարող էին համակարգել ՆԱՏՕ-ի ուժերը։ «Երկու մայոր» ալիքը գրում է, որ առաջին հարվածի նախօրեին Սև ծովի վերևում գտնվել է RC-135U հետախուզական ինքնաթիռը, որի կառավարումը, ալիքի պնդմամբ, «իրականացվում է Ռամշտայնում գտնվող ՆԱՏՕ-ի միացյալ ռազմաօդային ուժերի հրամանատարության (AIRCOM) միջոցով»։

Ուկրաինայի նախագահ Վլադիմիր Զելենսկին հայտնել է, որ կամրջին հարվածել են ուկրաինական «Պալյանիցա», «Նեպտուն», «Ռուտա» և «Ֆլամինգո» միջոցներով։ Նրա խոսքով՝ «Պալյանիցա» անօդաչու սարքերը խոցել են կամրջի ավտոմոբիլային հատվածը, իսկ «Նեպտուն» հրթիռները, «Ռուտա» անօդաչուներն ու FP-5 «Ֆլամինգոն»՝ երկաթուղայինը։

«Ռիբար» ալիքը տեղի ունեցածն անվանում է կամրջի «հատուկ ռազմական գործողության սկզբից ի վեր ամենալուրջ վնասումը»։ «Օբյեկտին դիպել է ավելի քան 10 «Ֆլամինգո» թևավոր հրթիռ՝ չհաշված անօդաչուները։ Հաշվի առնելով ՀՕՊ-ի առկա խնդիրները՝ առանց մեծ ջանքերի հաջողվել է այն «ճնշել» քանակով»,— գրում է ալիքը։

«Ակնհայտ է, որ սա կամրջանցման կրիտիկական վնասում է»,— արձանագրում է BBC-ի ռազմական վերլուծաբան Իլյա Աբիշևը։ Նրա բացատրությամբ՝ կամարը պարզապես դեկորատիվ մաս չէ․ այն մասնակցում է բեռնվածքների փոխանցմանը և պահում կամրջի թռիչքային կառուցվածքը՝ ապահովելով ամբողջ համակարգի կայունությունը։

Աբիշևի գնահատմամբ՝ կամարային կառուցվածքի փլուզումը թերակղզին զրկում է Ռուսաստանի հետ ուղիղ ավտոմոբիլային և երկաթուղային հաղորդակցությունից։ Այլընտրանք են մնում Զապորոժիեի և Խերսոնի մարզերի օկուպացված շրջաններով անցնող «ցամաքային միջանցքը», որը մշտապես ԱԹՍ-ների հարվածների տակ է, ինչպես նաև լաստանավային անցումն ու ծովային մատակարարումները։ Վերլուծաբանն ընդգծում է, որ վերջին երկու ուղիները նույնպես խոցելի են և սահմանափակ հնարավորություններ ունեն։

Կամրջի վերականգնման հնարավորությունը մնում է հարցականի տակ։ «Ի տարբերություն 2022 և 2023 թվականների՝ Ուկրաինայի զինված ուժերը հնարավորություն ունեն հարվածներ հասցնելու լողացող ամբարձիչներին և վերանորոգող խմբերին։ Նման պայմաններում նույնիսկ պատրաստի կամար տեղադրելը բարդագույն խնդիր է»,— գրում է «Ռիբարը»։ Աբիշևն էլ նախազգուշացնում է, որ տրանսպորտային և լոգիստիկ լուրջ ճգնաժամի վտանգը զգալիորեն աճել է։

Դատելով հարվածի կադրերից՝ Ուկրաինային հաջողվել է կատարելագործել «Ֆլամինգո» հրթիռը, «Ագենտստվո»-ին ասել է OSINT վերլուծաբան Կիրիլ Միխայլովը։ Նրա խոսքով՝ նախկինում «նկատվում էր թիրախից շատ մեծ շեղում, ինչի պատճառով այն ավելի հաճախ կիրառում էին խոշոր թիրախների, օրինակ՝ գործարանների արտադրամասերի դեմ»։

Միխայլովի գնահատմամբ՝ կամրջին հարվածելիս «Ֆլամինգոյի» ճշգրտությունը կարող էր բացատրվել ուղղորդման համար Starlink արբանյակային ինտերնետի կամ արագագործ արբանյակային կապի այլ համակարգերի կիրառմամբ։ «Starlink-ով FP-5-ը որոշ չափով փոխում է խաղի կանոնները»,— կարծում է փորձագետը։