ԱՄՆ Կոնգրեսի Ներկայացուցիչների պալատի դեմոկրատները Հաքիմ Ջեֆրիսին առաջադրել են խոսնակի պաշտոնում, երբ նա կուսակցությանն օգնել է մեծամասնություն ձեռք բերել ստորին պալատում, հայտնում է NBC News-ը:

Սա նրան ճանապարհ է բացում դեպի այս պաշտոնում ընտրվելը Կոնգրեսի նոր կազմի աշխատանքների առաջին օրը՝ հունվարին:

Փակ քվեարկությանը մասնակցած երկու աղբյուրների տվյալներով՝ Ջեֆրիսի թեկնածությանը սատարել է 251 մասնակից, 11-ը դեմ են հանդես եկել: Արդյունքը դարձավ քաղաքական գործչի ուժի ցուցադրություն՝ չնայած կուսակցության առաջադեմ թևի որոշ ներկայացուցիչների և ակտիվիստների դժգոհությանը, որոնք կոչ էին անում ավելի վճռական և նոր ղեկավարության: Այնուամենայնիվ, այլընտրանքային թեկնածու չէր առաջադրվել:

Ջեֆրիսի կողմնակիցներից ոմանք առաջարկել էին նրա թեկնածությունը հաստատել բանավոր քվեարկությամբ (ակլամացիայով)՝ առանց ձայների հաշվառման: Քաղաքական գործիչն ինքըն պնդել է անվանական քվեարկություն անցկացնել, որպեսզի խմբակցության յուրաքանչյուր անդամ կարողանա բացահայտորեն արտահայտել իր աջակցությունը կամ անհամաձայնությունը: Նա նշել է, որ դեմոկրատները նմանատիպ կերպով էին վարվել 2018 թվականին, երբ միջանկյալ ընտրություններից հետո Նենսի Փելոսիին կրկին առաջադրեցին խոսնակի պաշտոնում՝ չնայած ղեկավարությունը նոր սերնդին փոխանցելու կոչերին:

«Ինձ թվում է՝ ճիշտ կլիներ կիրառել ճիշտ նույն մոտեցումը՝ յուրաքանչյուր անձի հնարավորություն ընձեռելով արտահայտվելու և որոշելու, թե ով է, ելնելով իր փորձից, ծառայությունների ցանկից և ապագայի տեսլականից, առավել հարմար առաջնորդելու մեզ Կոնգրեսի նոր կազմում»,- երեքշաբթի օրը լրագրողներին հայտարարել է Ջեֆրիսը:

Քվեարկությունից հետո նրա թեկնածությանը դեմ արտահայտված 11 դեմոկրատներից յոթը հանդես են եկել համատեղ հայտարարությամբ: Դրանում նրանք նշել են, որ ընտրողները կուսակցությանը մանդատ են տվել առաջ մղելու այնպիսի նախաձեռնություններ, ինչպիսիք են համընդհանուր բժշկական ապահովագրությունը Medicare for All ծրագրով, ԱՄՆ Ներգաղթային և մաքսային ոստիկանության (ICE) խիստ գործողությունների դադարեցումը, քաղաքականության վրա փողի ազդեցության սահմանափակումը և Գազայում Իսրայելի ռազմական գործողությունների դադարեցումը:

Հայտարարությունը ստորագրել են ընտրված կոնգրեսականներ Դարիալիս Ավիլա Շևալյեն, Ադամ Համավին, Ֆրեդերիկ Հեյնսը, Մելատ Կիրոսը, Դոնավան Մակկինին, Քրիս Ռաբբը և Քլեր Վալդեսը:

«Բարեխիղճ բանակցությունների ընթացքում մենք փորձել ենք առաջնորդ Ջեֆրիսից կոնկրետ պարտավորություններ կորզել: Թեև մենք տեսնում ենք զգալի առաջընթաց, դեռևս շատ բան կա անելու, որպեսզի Կոնգրեսի հաջորդ կազմում մեր կուսակցության կուրսը համապատասխանի նրան, ինչ մեր ընտրողները պահանջում են նրա ղեկավարությունից»,- ասվում է հայտարարությունում:

Հեղինակներն ընդգծել են, որ բանակցությունները շարունակվում են, և դրանով են բացատրել Ջեֆրիսի թեկնածությանը դեմ քվեարկելու իրենց որոշումը:

Նրա առաջադրումը սատարել են դեմոկրատական ​​խմբակցության ներսում տարբեր խմբեր ներկայացնող հինգ գործընկերներ՝ Նյու Մեքսիկոյից Թերեզա Լեգեր Ֆեռնանդեսը, Կալիֆոռնիայից Դերեկ Չանը, Վիսկոնսինից Մարկ Պոկանը, Նյու Ջերսիից ընտրված կոնգրեսվումեն Ռեբեկա Բեննետը և մեծամասնության նախկին կուսակցական կազմակերպիչ, Ջեֆրիսի քաղաքական դաստիարակներից մեկը՝ Հարավային Կարոլինայից Ջիմ Քլայբըրնը:

Հաքիմ Ջեֆրիսը կարող է դառնալ ԱՄՆ պատմության մեջ առաջին սևամորթ խոսնակը

«Ինձ համար սա բացարձակապես սյուրռեալիստական պահ է»,- քվեարկությունից առաջ լրագրողներին ասել է Քլայբըրնը: ԱՄՆ-ում քաղաքացիական իրավունքների շարժման վետերանը նախկինում գլխավորել է Կոնգրեսի սևամորթ անդամների խմբակցությունը:

56-ամյա Ջեֆրիսը՝ բրուքլինցի, նախկին իրավաբան և Նյու Նյորք նահանգի օրենսդիր, այժմ կարող է դառնալ ԱՄՆ պատմության մեջ Ներկայացուցիչների պալատի առաջին սևամորթ խոսնակը:

Վերջին ամիսներին նա նախընտրական քարոզարշավ էր անցկացրել ամբողջ երկրով մեկ և օգնել դեմոկրատներին ստանալ, ըստ NBC News-ի կանխատեսման, 259 տեղ Ներկայացուցիչների պալատում: Դա կլինի կուսակցության ամենամեծ մեծամասնությունը վերջին 35 տարվա ընթացքում և զգալիորեն ավելին, քան հունվարի 3-ին անցկացվելիք լիագումար նիստում խոսնակ ընտրվելու համար անհրաժեշտ 218 ձայնը:

Այսպիսով, Ջեֆրիսը կկարողանա իրեն թույլ տալ մոտ 40 ձայն ընդդիմադիրներից սեփական խմբակցության ներսում և միևնույն ժամանակ պահպանել ընտրվելու շանսերը: Համեմատության համար նշենք, որ 2023 թվականին հանրապետական ​​Քևին ՄըքՔարթին տիրապետում էր խիստ փոքր առավելության՝ 222 տեղ ընդդեմ դեմոկրատների 212-ի, և կարողացավ ստանալ խոսնակի պաշտոնը միայն 15 փուլ քվեարկությունից հետո:

Անցյալ շաբաթ Ներկայացուցիչների պալատի հանրապետականները Օհայոյից իրավաբանական կոմիտեի նախագահ Ջիմ Ջորդանին ընտրեցին փոքրամասնության առաջնորդ Կոնգրեսի հաջորդ կազմում՝ նախապատվությունը տալով Լուիզիանայից մեծամասնության առաջնորդ Սթիվ Սքալիզին:

Դեմոկրատների մյուս հիմնական ղեկավար պաշտոնները ևս մնում են առանց այլընտրանքի: Ակնկալվում է, որ դրանց շուրջ քվեարկությունները տեղի կունենան չորեքշաբթի օրը՝ ավելի ուշ, կամ հինգշաբթի:

Ենթադրվում է, որ Մասաչուսեթսից Քեթրին Քլարկը կդառնա մեծամասնության առաջնորդ՝ խմբակցության երկրորդ ամենակարևոր ղեկավարը: Նա կարող է դառնալ Կոնգրեսի երկու պալատների պատմության մեջ առաջին կինը, որը կզբաղեցնի այս պաշտոնը:

Կալիֆոռնիայից Պիտ Ագիլարը, ինչպես սպասվում է, կընտրվի մեծամասնության կուսակցական կազմակերպիչ՝ խմբակցության երրորդ պաշտոնյան, որը պատասխանատու է ձայների հաշվարկի համար: Լատինամերիկյան ծագում ունեցող ոչ մի ներկայացուցիչ նախկինում չի զբաղեցրել այդքան բարձր ղեկավար պաշտոն Ներկայացուցիչների պալատում:

Կալիֆոռնիայից կոնգրեսական Թեդ Լյուն միաձայն ընտրվել է խմբակցության նախագահ՝ չորրորդ ամենակարևոր պաշտոնում: Նա կարող է դառնալ այս պաշտոնում ասիական ծագմամբ առաջին ամերիկացին: Կոլորադոյից Ջո Նեգուսը, ինչպես սպասվում է, կդառնա խոսնակի օգնական:

Միակ լուրջ մրցակցային պայքարը ղեկավար պաշտոնի համար ծավալվել է դեմոկրատական ​​խմբակցության փոխնախագահի պաշտոնի շուրջ: Դրան հավակնում են Կալիֆոռնիայից Սառա Ջեյքոբսը, որն մտնում է Առաջադիմակական կոկուսի (Congressional Progressive Caucus) մեջ, և Իլինոյսից Լորեն Անդերվուդը, որը ներկայացնում է Կոնգրեսի սևամորթ անդամների կոկուսը:

Ջեֆրիսը՝ Փելոսիի քաղաքական պաշտպանյալը, նախկինում գլխավորել է դեմոկրատական ​​խմբակցությունը, իսկ 2022 թվականի միջանկյալ ընտրություններում կուսակցության պարտությունից հետո դարձել է փոքրամասնության առաջնորդ:

Չորեքշաբթի նա մի շարք հանդիպումներ է անցկացրել ապագա մեծամասնության ներսում գտնվող տարբեր խմբերի հետ, որոնք նա պետք է միավորի օրինագծերի ընդունման համար, դրանց թվում՝ ապրանքների և ծառայությունների մատչելիության հարցերով: Մասնավորապես, նա առանձին հանդիպել է Առաջադիմական կոկուսի ղեկավարության և երկու չափավոր միավորումների՝ Նոր դեմոկրատների կոալիցիայի և «Կապույտ շներ» խմբի հետ:

«Սա հիանալի կազմ է, և դրա մասնակիցներն ունեն շատ հիանալի գաղափարներ՝ թարմ, նոր, համարձակ՝ այն մասին, թե ինչպես հասնել առաջընթացի հանուն ամերիկյան ժողովրդի շահերի»,- լրագրողներին հայտարարել է Ջեֆրիսը: