Բահրեյնում ԱՄՆ դեսպանատունը ամերիկացի քաղաքացիներին կոչ է արել բարձր զգոնություն ցուցաբերել վերջին շաբաթվա ընթացքում Իրանի կողմից հարվածներ հասցնելու առնվազն չորս փորձից հետո։

«Բահրեյնում գտնվող ամերիկացիները պետք է բարձր զգոնություն ցուցաբերեն՝ Իրանի աջակցությունը վայելող հութիների կողմից զինված հարձակումների աճող սպառնալիքի, ինչպես նաև տարածաշրջանում ամերիկացի պետական ծառայողների և ԱՄՆ օբյեկտների վրա հարձակվելու Իրանի փորձերի կապակցությամբ»,- ասվում է չորեքշաբթի՝ նոյեմբերի 18-ին, դեսպանատան հրապարակած անվտանգության վերաբերյալ նախազգուշացման մեջ։

Դիվանագիտական ներկայացուցչությունը նաև խորհուրդ է տվել հաշվի առնել սպառնալիքների մասին նոր նախազգուշացումների, չվերթների չեղարկման, օդային տարածքի փակման և տրանսպորտային հաղորդակցության խափանումների հնարավորությունը։

ԱՄՆ զինված ուժերի կենտրոնական հրամանատարության (CENTCOM) տվյալներով՝ արձակված բոլոր հրթիռները որսվել են և վնաս չեն պատճառել։ Ինչպես հաղորդվել է, Իրանը փորձել է հարձակվել Բահրեյնում ամերիկյան ռադիոլոկացիոն օբյեկտների վրա։ Չորեքշաբթի, ըստ լրատվամիջոցների, հարձակումներն ուղղված են եղել նաև Քուվեյթի դեմ։

Չորեքշաբթի CENTCOM-ն առանձին հայտարարել է, որ այս շաբաթ հասցված հարվածների հետևանքով ամերիկացի ոչ մի զինծառայող չի տուժել։ Հայտարարությունը հրապարակվել է ի պատասխան համացանցում տարածվող՝ ԱՄՆ զինվորականների շրջանում հնարավոր կորուստների մասին լուրերի։