նախընտրելի դարձնելԿանադայի ոստիկանությունը դիմել է «Ինտերպոլին», որպեսզի համատեղ ուժերով կարողանան գտնել պոռնոդերասանին, ով կասկածվում է փոստով մարդկային մարմնի մասեր ուղարկելու մեջ: Կա ենթադրություն, որ մարդասպան Լուկա Ռոկկո Մանյոտան փախել է երկրից:
Ինչպես հաղորդում է BBC-ն` վկայակոչելով Կանադայի ոստիկանության ներկայացուցչի խոսքը, Մանյոտան ինտերնետ կայքերից մեկում հաղորդագրություն է թողել, որտեղ նշում է, թե ինչպես է հավերժ անհետանալու:
Ենթադրվում է, որ նա գտնվում է Փարիզում: Տեղի լրատվամիջոցները ակտիվորեն նախազգուշացնում են, որ պոռնոդերասանը կարող է գտնվել երկրի ցանկացած հատվածում, գրում է NEWSru.com-ը:
Ավելի վաղ NEWS.am-ը հայտնել էր, որ Կանադայում մարդկային մարմնամասերով ծանրոցներ ուղարկելու մեջ կասկածում են պոռնոաստղ-երկսեռական Լուկա Ռոկկո Մանյոտային, ով հայտնի է նաեւ Էրիկ Նյուման Քլինթոն եւ Վլադիմիր Ռոմանով կեղծանուններով:
Երկու սարսափազդու ծանրոցները հայտնաբերվել էին կանադական մայրաքաղաքում. Պահպանողական կուսակցության շտաբ ուղարկված ծանրոցում մարդկային կտրված ոտք է եղել, իսկ մյուսում, որը հասցեագրված էր Ազատական կուսակցությանը` մարդկային դաստակ:
Բացի այդ, Մոնրեալում աղբակույտի մեջ ճամպրուկով մարդու իրան է գտնվել, մանրամասներ է հաղորդում NEWSru.com-ը:
Հանցանշանները Մոնրեալի ոստիկանությանն ուղորդել են դեպի Մանյոտայի տուն, որտեղ արյան հետքերով դոշակ է գտնվել: Բացի այդ, քննիչների ձեռքում, ըստ ամենայնի, հայտնվել է հանցանքի տեսագրությունը:
Տեղի լրատվամիջոցների հաղորդմամբ` համացանցում մի քանի օր շրջանառվում էր տեսագրություն, թե ինչպես է 29-ամյա Մանյոտան բազմիցս մարդուն հարվածում կացնով, այնուհետեւ հանում աչքը եւ անդամահատում նրան:
Ոստիկանները կարծում են, որ մարդասպանն ու զոհը ծանոթներ են եղել, բայց զոհի մարմինը նույնականացնել չի հաջողվել, քանի որ ոստիկանությունը չունի մարմնի բոլոր մասերը:
Կասկածյալի հանդեպ դաշնային հետախուզություն է հայտարարվել: Ոստիկանությունը բոլոր հիմքերն ունի հանցագործին հնարավորինս արագ որոնելու, քանի որ կտրված ոտքի հետ դրված երկտողում հաղորդվել էր, որ հանցագործը կրկին փորձել է սպանություն գործել: Բացի այդ, նշվել էր, որ ուղարկվել են մարմնի վեց մասեր:
