նախընտրելի դարձնելԿանադացի մարդասպան պոռնոդերասան Լուկա Ռոկկո Մանյոտին կամ Վլադիմիր Ռոմանովին փնտրում էին Փարիզում, բայց գտել ու ձերբակալել են Բեռլինում: Այս մասին հաղորդում է Reuters-ը:
Ավելի վաղ NEWS.am-ը հայտնել էր, որ Կանադայում մարդկային մարմնամասերով ծանրոցներ ուղարկելու մեջ կասկածում են պոռնոաստղ-երկսեռական Լուկա Ռոկկո Մանյոտին, ով հայտնի է նաեւ Էրիկ Նյուման Քլինթոն եւ Վլադիմիր Ռոմանով կեղծանուններով:
Երկու սարսափազդու ծանրոցները հայտնաբերվել էին կանադական մայրաքաղաքում. Պահպանողական կուսակցության շտաբ ուղարկված ծանրոցում մարդկային կտրված ոտք է եղել, իսկ մյուսում, որը հասցեագրված էր Ազատական կուսակցությանը` մարդկային դաստակ:
Բացի այդ, Մոնրեալում աղբակույտի մեջ ճամպրուկով մարդու իրան է գտնվել, մանրամասներ է հաղորդում NEWSru.com-ը:
Հանցանշանները Մոնրեալի ոստիկանությանն ուղղորդել են դեպի Մանյոտի տուն, որտեղ արյան հետքերով դոշակ է գտնվել: Բացի այդ, քննիչների ձեռքում, ըստ ամենայնի, հայտնվել է հանցանքի տեսագրությունը:
Տեղի լրատվամիջոցների հաղորդմամբ` համացանցում մի քանի օր շրջանառվում էր տեսագրություն, թե ինչպես է 29-ամյա Մանյոտը բազմիցս մարդուն հարվածում կացնով, այնուհետեւ հանում աչքը եւ անդամահատում նրան:
Ոստիկանները կարծում են, որ մարդասպանն ու զոհը ծանոթներ են եղել, բայց զոհի մարմինը նույնականացնել չի հաջողվել, քանի որ ոստիկանությունը չունի մարմնի բոլոր մասերը:
Կասկածյալի հանդեպ դաշնային հետախուզություն է հայտարարվել: Ոստիկանությունը բոլոր հիմքերն ունի հանցագործին հնարավորինս արագ որոնելու, քանի որ կտրված ոտքի հետ դրված երկտողում հաղորդվել էր, որ հանցագործը կրկին փորձել է սպանություն գործել: Բացի այդ, նշվել էր, որ ուղարկվել են մարմնի վեց մասեր:
