նախընտրելի դարձնելԿամ ԱՄՆ-ն ի զորու չէ ազդել կողմերի վրա, եւ մենք ունենք անկառավարելի հարեւան, կամ ԱՄՆ-ի համար այդքան էլ էական չէ, թե ինչ կլինի, անգամ եթե դա վերածվի լոկալ առճակատման: Այս մասին, այսօր` հունիսի 7-ին, լրագրողների հետ հանդիպմանն ասաց «Ժառանգություն» կուսակցության անդամ, նախկին պատգամավոր Ստեփան Սաֆարյանը` անդրադառնալով` ԱՄՆ պետքարտուղար Հիլարի Քլինթոնի այցին զուգահեռ հայ-ադրբեջանական սահմանին ձեւավորված չափազանց լարված վիճակին: Նրա կարծիքով`տեսանելի է, որ Քլինթոնի ներկայությունը չի կարող զսպել Ալիեւին:
«Եվրատեսիլից մինչեւ դիվերսիաներ Ադրբեջանը փորձում է սեփական հասարակությանն ապացուցել, որ իրենք ի զորու են վերադարձնել Ղարաբաղը, եթե հարձակվեն ու հաղթեն: Բայց միեւնույն ժամանակ այս ամենը նաեւ զոնդաժ է. հարկ է ճշտել, թե ինչպե՞ս այդ ամենին կվերաբերի միջազգային հանրությունը»,- նշեց Ս. Սաֆարյանը:
«Ժառանգության ներկայացուցչի խոսքով` Հայաստանը խնդիր ունի այդ դինամիկայի դեմն առնելու եւ ստեղծելու այնպիսի մեխանիզմներ, որոնք թույլ կտան պահպանել այդ իրավիճակը:
Նախկին պատգամավորը կարծիք հայտնեց, որ ԱՄՆ–ն պետք է ծանրակշիռ հիմքեր ուենանա մեր երկիր այցելելու համար, քանի որ ԱՄՆ պետքարտուղարները հաճախակի, կամ կարելի է ասել ընդհանրապես չեն եկել Հայաստան։ «Առաջին անգամ եկել են 2011–ին, երկրորդը՝ այս տարի»,- ասաց նա` շեշտելով, որ այցելությունը սկսվեց Հայ–թուրքական արձանագրությունների ստորագրումից հետո, ինչից էլ կարելի է հասկանալ, թե ԱՄՆ-ի համար ինչքան կարեւոր է սահմանի բացումը։
Ստեփան Սաֆարյանը նշեց նաեւ, որ Քլինթոնի այցելության աշխարհագրությունը՝ Հարավկովկասյան երեք երկրներ եւ Թուրքիա, եւս ինչ-որ բան ասում է։
«Երբ աշխարհի մտահոգությունն Իրանի միջուկային ծրագրի մասին է, երբ Գերմանիան Իսրայելին տալիս է ավիակիրներ, երբ Սիրիայում ստեղծվել է քաոս, այս իրավիճակում Միացյալ նահանգները չի կարող անտեսել անգամ Հայաստանը»,- ասաց Սաֆարյանը։
Լուսանկարը` Սոնա Բարսեղյանի
