նախընտրելի դարձնելԻսլամական Իրանը, ըստ ամենայնի, հանգիստ չի տալիս Ադրբեջանին, եւ դա հատկապես երեւաց «Եվրատեսիլի» ժամանակ: Սակայն արմատներն ավելի խորն են, հաղորդում է «Deutsche Welle»-ն:
Ադրբեջանի լավ հարաբերությունները ԱՄՆ-ի եւ Իսրայելի հետ Թեհրանի «կոկորդին ոսկոր» են դարձել: Իսրայելը Ադրբեջանին ռազմական սպառազինություններ է մատակարարում, իսկ վերջին տեղեկությունները բացահայտեցին Իրանին հարվածելու համար Ադրբեջանի ռազմաօդային բազաներից օգտվելու Իսրայելի մտադրությունները:
«Եվրատեսիլի» նախաշեմին իրանական բոլոր պետական ԶԼՄ-ները քննադատության ենթարկեցին Ադրբեջանին «հակաիսլամական շոուի» համար: Ադրբեջանն արձագանքեց «Եվրատեսիլից» միայն մի քանի օր անց:
Ինչպես նշել էր մեջլիսի պատգամավոր Ռասիմ Մուսաբեկովը, «կրոնապետական պետությունը ցանկանում է ձեւավորել մեր քաղաքականությունը»:
Նույնատիպ տեսակետ ունի Բեռլինում բնակվող Ադրբեջանի հարցերով փորձագետ Ահմեդ Օմիդ Յազդանին: «Ադրբեջանի լավ հարաբերությունները Իսրայելի, ԱՄՆ-ի եւ այլ երկրների հետ անհանգստացնում են Իրանին: Ադրբեջանը կողմնորոշվում է դեպի արեւմուտք, իսկ Իրանը դա տանել չի կարողանում»,-հայտարարել է Յազդանին: Հակամարտության մյուս պատճառը Հայաստանի հետ Իրանի հարաբերությունների բարձր մակարդակն է, հիշեցրել է նա:
Արտաքին քաղաքականության հարցերով գերմանական խորհրդի (DGAP) փորձագետ Ստեֆան Մեյստերի կարծիքով, Ադրբեջանը վախենում է իր հարավային հարեւանի ազդեցությունից եւ իսլամացումից:
Մեյստերի կարծիքով` արեւմտյան երկրները պետք է աջակցեն Ադրբեջանին, սական ուղղակիորեն չմիջամտեն նրա ներքին քաղաքականությանը եւ նրան չհրահրեն Իրանի դեմ քայլերի: Նրա կարծիքով` անհրաժեշտ է վստահություն եւ համագործակցություն հաստատել մի շարք այլ ոլորտներում, օրինակ, թմրանյութերի դեմ պայքարում կամ տնտեսական հարբերություններում: Հարցն այն է, թե որքանով են դրան պատրաստ թե Թեհրանը, թե Բաքուն:
