նախընտրելի դարձնելՀայաստանում ամեն չորրորդ կամ հինգերորդ զույգն ունենում է առաջնային կամ երկրորդային անպտղություն: Այս մասին, այսօր՝ հունիսի 30-ին, լրագրողների հետ հանդիպման ժամանակ ասաց «Էրեբունի» բժշկական կենտրոնի գինեկոլոգ Արման Սահակյանը:
Բժշկի սահմանմամբ՝ առաջնայինն այն է, երբ զույգը մեկ տարվա ռեգուլյար սեռական կյանքի պայմաններում չի ունենում հղիություն, իսկ երկրորդայինը, երբ եղել է մեկ կամ մի քանի հղիություն, բայց այլեւս չի ստացվում: Նա շեշտեց, որ 90-ականներին ծնված երեխաները հիմա են հղիանալու եւ հղիությունը դժվար տանելու հետ խնդիրներ ուներ:
Բժիշկը չի կարծում, որ հագուստը, սնունդը կամ էկոլոգիան ազդում են մարդու անպտղության վրա: Դրանք հնարավոր է շատ փոքր նպաստող պայմաններ լինեն, բայց պատճառ չեն կարող հանդիսանալ: Արման Սահակյանի խոսքով՝ կանանց կուսության երկար պահպանումը եւս չի նպաստում անպտղությանը:
Փոխարենը՝ անպտղության պատճառները կանանց մոտ ինֆեկցիաներն են, հորմոնալ, անատոմիական, մեխանիկական, իմունոլոգիական խնդիրները, իսկ տղամարդկանց մոտ՝ սերմի խնդիրները:
Նրա փոխանցմամբ՝ վերջերս շատացել է տղամարդկանց հետ կապված ինֆեկցիոն բորբոքային խանգարումները, սթրեսների հետեւանքով առաջացող անպտղությունը:
Արման Սահակյանը շեշտեց, որ նախկինում շատ հազվադեպ էր լինում, երբ տղամարդը դիմում էր բժշկի, իսկ այժմ հաճախացել են նաեւ զույգերը, որոնք նախօրոք են դիմում բժշկի` հետազոտվելու համար, ինչը ողջունելի քայլ է: Օրինակ՝ տարեկան հինգ-վեց զույգ դիմում է միայն իրեն, մայրերը եւս հետեւողական են դարձել՝ իրենց աղջիկների հետ ունեցած խնդիրների հանար: Առհասարակ, անպտղությունը հեշտ է հաղթահարել, երբ զույգն է դիմում բժշկի:
Ինչ վերաբերում է անպտղության բուժմանը, եթե դրա մեջ չկա վիրահատական միջամտություն, ապա ամենաթանկ միջամտությունն անպտղության հետ կապված էկոն է՝ սկսած 950 հազար դրամից: Կա նաեւ չբուժվող անպտղություն, օրինակ, երբ տղամարդը սերմ չունի:
Ասուլիսի մյուս բանախոսը՝ հոգեբան Սիրանուշ Անդրեասյանը, եւս նշեց, որ դեռեւս կան կարծրատիպեր, որ խնդիրները ավելի շատ կանանց մոտ են, քան տղամարդկանց: «Մեր հասարակությունը գնում է դեպի եվրոպական հասարակություն, որը քարոզում է ազատ սեռական հարաբերություններ: Բայց մյուս կողմից էլ մեր հասարակության մոտ ընդունված է տաբուներով երեխաներին մեծացնելը: Արդյունքում, գաղտնի սեռական հարաբերությունները սովորաբար բերում են տարբեր խնդիրների՝ ինչպես հոգեբանական, այնպես էլ տեղեկատվական դաշտում»,- ասաց նա՝ կարեւորելով սեռական դաստիարակությունն առանց տաբուների:
Հոգեբանն առանձնացրեց նաեւ մեկ այլ խնդիր, օրինակ՝ երբ կինը չի կարողանում հղիանալ, որից զույգն սկսում է նյարդայնանալ ու անհանգստանալ այդ հարցի շուրջ, իսկ դա բերում է տարբեր խնդիրների, օրինակ՝ սեռական ցանկության բացակայություն:
Ամենաշատը, նրա փոխանցմամբ, կանայք են դիմում հոգեբանի, երբ հասկանում են, որ դրանից այնքան են նյարդայնանում, որ դա դառնում է իդեա ֆիքս:
