նախընտրելի դարձնելՌուսաստանի նախագահ Վլադիմիր Պուտինը մեկնել է աղետի գոտի` Կրասնոդարի մարզ եւ անձամբ կայցելի ջրհեղեղից տուժած որոշ բնակավայրեր, որտեղ բազմաթիվ զոհեր են եղել: Այս մասին հաղորդել է ՌԴ նախագահի մամուլի քարտուղար Դմիտրի Պեսկովը:
Պուտինը, նրա խոսքով, ուղղաթիռով կլինի գրեթե բոլոր շրջաններում, ապա տեղում օպերատիվ շտաբի աշխատանքային նիստ կանցկացնի ԱԻՆ-ի, տեղի իշխանությունների, առողջապահության նախարարության եւ այլ հաստատությունների ներկայացուցիչների մասնակցությամբ, հաղորդում է «ՌԻԱ նովոստին»:
Վերջին տվյալներով, ջրհեղեղի զոհերի թիվը հասել է 103-ի: Ավելի վաղ նշվում էր 99 զոհի մասին:
«Գետը կոտրել է 20 մետրանոց բետոնե ցանկապատը, լցվել տները, կոտրել հանգստացողների ավտոմեքենաները, ոչնչացրել այգիները: Ցանկապատի կտորները հայտնվել են իրենց նախնական վայրից 60 մետր հեռավորության վրա»,-իր բլոգում ջրհեղեղը նկարագրել է Մարկ Կովալենկոն: Նրա խոսքով, Կրիմսկում մի կին 6 ժամ շարունակ մնացել է գազօջախի վրա կանգնած:
Ջուրը տներն է լցվել գշերը ժամը 3-ին, երբ բոլորը քնած են եղել: Մի քանի րոպե անց ջուրը բարձրացել է մի քանի մետր, շենքերի առաջին հարկերն ամբողջությամբ ջրի տակ են մնացել: Ականատեսների խոսքով, հատկապես բարդ իրավիճակ է եղել Կրիմսկում, Ներքին Բականկա եւ Նովոուկրաինկա ավաններում:
Գելենջիկի կենտրոնում իսկական ջրհեղեղ է եղել, ջուրը քշել է ատրակցիոնները դեպի ծովափ, նշում են ականատեսները:
Մարդիկ գրում են, որ չկա էլեկտրականություն, խմելու ջուր եւ հաց, փակ են խանութները, չի աշխատում կայուղին եւ հեռախոսային կապը, անջատված է գազը: Հիվանդանոցները ջրի տակ են եւ սննունդ չունեն:
Մարդիկ նշում են, որ իրենց ոչ ոք չի զգուշացրել աղետի մասին, ոչ ԱԻՆ-ը, ոչ օդերեւութաբանները, ոչ շտապօգնությունը, իսկ տեղի եւ մարզային իշխանություններից օգնություն դեռ չկա:
