նախընտրելի դարձնելՀայաստանի Ազգային ժողովի նախագահ Հովիկ Աբրահամյանն, այսօր` հուլիսի 11-ին, ընդունել է պաշտոնական այցով Հայաստան ժամանած ՌԴ Դաշնային ժողովի Դաշնության խորհրդի նախագահ Վալենտինա Մատվիենկոյին:
Կարճատեւ առանձնազրույցից հետո հանդիպումը շարունակվել է ընդլայնված կազմով:
Հովիկ Աբրահամյանը նշել է, որ վերջին տարիներին հայ-ռուսական միջխորհրդարանական կապերը նոր մակարդակի են բարձրացել, ավելի հաճախակի են դարձել շփումները երկու խորհրդարանների միջեւ, ինչին, անշուշտ, նպաստում են նաեւ օրենսդիր մարմինների նախագահների բարձր մակարդակով հանդիպումները:
ԱԺ նախագահը վստահություն է հայտնել, որ միջխորհրդարանական հանձնաժողովի նոր կազմը հաջողությամբ կշարունակի աշխատանքը:
Վալենտինա Մատվիենկոն ընդգծել է, որ տարբեր դիտորդական կառույցներում ընդգրկված ՌԴ պատվիրակները օբյեկտիվորեն արձանագրել են Հայաստանում խորհրդարանական ընտրությունների` բարձր մակարդակով ու օրենսդրությանը համապատասխան անցկացման փաստը, դրանք գնահատելով որպես եւս մեկ քայլ առաջ Հայաստանում պառլամենտարիզմի եւ ժողովրդավարության զարգացման ուղղությամբ:
ՌԴ Դաշնության խորհրդի նախագահն ընդգծել է երկու երկրների տարածաշրջանների միջեւ համագործակցության հետագա ծավալումը` պատրաստակամություն հայտնելով նպաստելու դրանց ընդլայնմանը: Նա դրական է գնահատել տարածաշրջանների միջեւ հայ-ռուսական առաջին համաժողովի անցկացումը` նպատակահարմար համարելով խորհրդարանների հովանու ներքո նման միջոցառումների պարբերական կազմակերպումը:
Հայ-ռուսական կապերի հետագա ամրապնդման գործում կողմերը կարեւորել են տարբեր քաղաքացիական ու հասարակական կառույցների փոխգործակցության աշխուժացումը:
Հովիկ Աբրահամյանն առաջարկել է քննարկել երկու խորհրդարաններում փոխադարձաբար ներկայացուցիչներ ունենալու հարցը, ինչը, նրա խոսքով, կնպաստի միջխորհրդարանական երկկողմ համագործակցության ավելի սերտացմանն ու արդյունավետության բարձրացմանը:
Վալենտինա Մատվիենկոն Աբրահամյանին հրավիրել է պաշտոնական այցով Ռուսաստան:
Վալենտինա Մատվիենկոն եւ նրա գլխավորած պատվիրակությունը եղել է նաեւ Ազգային ժողովի նիստերի դահլիճում: Նա գրառում է կատարել ԱԺ պատվավոր հյուրերի գրքում:
