ՆախընտրելիԵրևանի ճանապարհների ասֆալտապատման աշխատանքների հիմնական փուլը կավարտվի մինչև հուլիսի 15-ը: Այդ մասին NEWS.am-ի թղթակցի հետ զրույցում հայտարարեց Երևանի քաղաքապետարանի շինարարության և բարեկարգման բաժնի պետ Ֆելիքս Յայլոյանը:
Նրա խոսքով, հիմնական կապիտալ աշխատանքները կավարտվեն այդ ժամկետում, իսկ ծրագրի մնացած մասը կիրականացվի սեպտեմբերին:Ինչպես նշեց զրուցակիցը, ասֆալտապատման ծրագրի շրջանակներում կատարվել են 1 մլն 700 հազար քմ մակերեսով վերանորոգման և բարեկարգման աշխատանքներ, այդ թվում նաև 630 հազար ք մ փողոցներ և ճանապարհներ: «Լիովին ավարտվել են աշխատանքները Բաղրամյան, Խանջյան, Կողբացու, Բաբաջանյան, Աճառյան, Մյասնիկյան փողոցներում, մասամբ Սարյան, Պուշկինի և մի շարք այլ փողոցներում: Պարոնյանի, Պրոշյանի և մի քանի այլ փողոցներում տեղադրվում են հենապատեր», - նշել է Յայլոյանը, ավելացնելով, որ բուն ասֆալտապատումից բացի աշխատանքներ են տարվել տրամվայի ուղիների ապամոնտաժման ուղղությամբ, օրինակ, Բագրատունյաց փողոցում:
Աշխատանքները տարվում են Երևանի քաղաքապետարանի պատվերով, դրանց կատարումը իրենց վրա են վերցրել մրցույթը շահած կապալառու ընկերությունները` «Սահակյանշին», «Խաչար», «Վահագն և Սամվել», «Նարիմանյան» և ուրիշներ: «Ես չեմ հիշում, որ Երևանում երբևիցէ իրականացվեր այսպիսի մասշտաբային ծրագիր», - նշել է Յայլոյանը:
