նախընտրելի դարձնելԲալկաններում հայտնի թմրաբարոն Դարկո Շարիչը, որը թաքնվում է արդարադատությունից, 10 միլիոն եվրո պարգեւատրություն է առաջարկել Սերբիայի 6 բարձրաստիճան պաշտոնյաների սպանության համար, որոնց նա մեղավոր է համարում իր հանցավոր կայսրության քայքայման գործում: Այդ մասին հայտնում է բելգրադյան «Պրեսս» թերթը` հղում անելով արեւմտյան հատուկ ծառայությունների տվյալներին, հաղորդում է «ՌԻԱ Նովոստին»:
Արեւմտյան հատուկ ծառայություններից մեկը նախորդ շաբաթ Անվտանգության եւ տեղեկատվության սերբական գործակալությանն (BIA) էր փոխանցել տեղեկություններ, ըստ որոնց Շարիչը ծրագրում է Սերբիայի նախկին նախագահ Բորիս Թադիչի եւ եւս մի քանի պաշտոնյաների սպանությունը:
Այդ ցուցակում են Ազգային անվտանգության խորհրդի համակարգման բյուրոյի նախագահ Միոդրագ Րակիչը, ներքին գործերի նախարար Իվիցա Դաչիչը, որին հանձնարարված է նոր կառավարություն ձեւավորել, ինչպես նաեւ BIA-ի ղեկավար Սաշա Վուկադինովիչը, կազմակերպված հանցավորության դեմ պայքարի դատախազ Միլկո Ռադիսավլեւիչը եւ արդարադատության նախարար Սնեժանա Մալովիչը:
Սերբիայի նոր նախագահ Տոմիսլավ Նիկոլիչը եւ նրա գրասենյակը տեղեկացվել են այդ մասին, պնդում է «Պրեսս» թերթը:
Կազմակերպված հանցավորության դեմ պայքարը Դեմոկրատական կուսակցության առաջնորդ Թադիչի գլխավոր սկզբունքն էր, որը Սերբիայի նախագահի պաշտոնն էր զբաղեցնում 2004 - 2012 թթ.:
Թադիչի եւ նրա համախոհների դեմ սպառնալիքներ վերջին տարիներին հաճախ են հայտնվել լրատվամիջոցներում:
2003 թվականի մարտի 12-ին Բելգրադում սպանվել էր Սերբիայի վարչապետ Զորան Ջինջիչը: Իշխանությունները հյտարարել էին, որ դեմոկրատ վարչապետի սպանության հետեւում կանգնած է հզոր «Զեմունսկի կլան» հանցախումբը, որի առաջնորդներին այն ժամանակ մտադիր էին ձերբակալել:
