նախընտրելի դարձնելԲուլղարական Բուրգաս քաղաքում Իսրայելից զբոսաշրջիկներով հուլիսի 18-ին պայթած ավտոբուսում պայթուցիկը տեղակայվել էր նախապես: Հնարավոր է` այն եղել է բեռնախցիկում: Այդ մասին, ինչպես բուլղարական լրատվամիջոցներին վկայակոչելով հաղորդում է «Էխո Մոսկվին», հայտարարել է երկրի ներքին գործերի նախարար Ցվետան Ցվետանովը:
Ըստ աղբյուրի` այժմ ոստիկանությունը երկու տարբերակ է դիտարկում: Առաջին`ռումբը թաքցված է եղել ճամպրուկներից մեկում եւ պայթել է բեռնախցիկ դնելու պահին: Երկրորդ` ահաբեկիչներն այն տեղադրել են ավտոբուսում նախապես, մինչեւ զբոսաշրջիկների գալը:
Ինչպես ավելի վաղ հայտնել էր NEWS.am-ը, բուլղարական Բուրգաս քաղաքում տեղական օդանավակայանից ոչ հեռու հուլիսի 18-ին պայթել էր իսրայելական զբոսաշրջիկներով ավտոբուսը, որի հետեւանքով զոհվել էր 7 մարդ, վիրավորվել` 29-ը:
Բուրգասը երկրում բնակչության թվով չորրորդ քաղաքն է, այն շատ կարեւոր մշակութային եւ տնտեսական կենտրոն է բուլղարական Մերձսեւծովյան շրջանում:
