նախընտրելի դարձնելՀուլիսի 23-ին Իրաքում ահաբեկչությունների շարքի հետեւանքով զոհվածների թիվը հասել է 110 մարդու: Վիրավորների թիվն աճել է 275-ի: Նախկինում հաղորդվում էր 90 զոհերի եւ 140 վիրավորների մասին:
Ինչպես Associated Press-ին վկայակոչելով հայտնում է rbc-ն, ահաբեկչության պատասխանատուները ճշտված չեն: Ըստ անվտանգության մարմինների` ահաբեկչություններն իրականացրել է «Ալ Կաիդա» խմբավորման իրաքյան թեւը:
Ինչպես ավելի վաղ հայտնել էր NEWS.am-ը, հուլիսի 23-ին գրոհայինները հարձակվել էին Իրաքի հյուսիս-արեւելքում գտնվող Ուդեյմ (Udaim) քաղաքի ռազմակայանի վրա` սպանելով 13 զինծառայողների:
Երկրի մայրաքաղաքում գրոհայինները պայթուցիկ են կիրառել կառավարական շենքի մոտ:
Նաեւ հաղորդվել էր, որ եւս մի քանի պայթյուններ են տեղի ունեցել Բաղդադում, իսկ երբ դեպքի վայրերից մեկում ժամանել են ոստիկանները եւ բժիշկները, ահաբեկիչ մահապարտը եւս մեկ պայթուցիկ է գործի դրել: Երկրի հյուսիսում գտնվող Կիրկուկ քաղաքում պայթել են ականապատ 4 մեքենաներ:
Ահաբեկչությունների շարք, որոնց նպատակը եղել են անվտանգության ծառայությունները եւ ոստիկանության աշխատակիցները, տեղի է ունեցել նաեւ Իրաքի արեւելքում գտնվող Դիալա նահանգում:
