նախընտրելի դարձնելՏաջիկստանի Խորոգ քաղաքում շարունակվում է գեներալ Աբդուլո Նազարովի սպանության կասկածյալներին ձերբակալելու հատուկ գործողությունը: Դուշանբեի զինվորական հիվանդանոց են շարունակում տեղափոխել կառավարական բանակի ծանր վիրավորված զինվորների, զոհվածների թիվը հարյուրի է հասնում: Հիշեցնենք, որ ավելի վաղ հաղորդվել էր 9 զոհերի եւ մի քանի տասնյակ վիրավորների մասին:
Գորնո-Բադախշանում անջատված են կապի բոլոր տեսակները:
Ըստ ականատեսների, որոնց հետ կապվել է BBC-ի ռուսական ծառայությունը, քաղաքի բնակիչների շրջանում խուճապ է, չեն աշխատում պետական հաստատությունները, շուկան եւ խանութները:
Հատուկ գործողության ընթացքում սպանվել են Պամիրի ոչ պաշտոնական առաջնորդ Եդգոր Շոմուսալամովը եւ Թոլիբեկ Այոմբեկովի որդին, որին իշխանությունները պաշտոնապես մեղավոր էին ճանաչել գեներալ Աբդուլո Նազարովի սպանության գործում:
Տաջիկստանի Սոցիալ-դեմոկրատական կուսակցության առաջնորդ Օլիմ Շերզամոնովը գործակալությանը պատմել է, որ Պամիրում էթնիկական մաքրում է տեղի ունենում:
Ըստ պաշտոնական վարկածի` Աբդուլո Նազարովի սպանության մեջ մեղադրվում է անօրինական զինված խմբավորումը տաջիկյան ընդդիմության նախկին հրամանատար Թոլիբեկ Այոմբեկովի հրամանատարության ներքո:
Հաղորդվում է, որ նա հրաժարվել է կամավոր հանձնվել եւ զինված դիմադրություն է ցուցաբերում: Նրան մեղադրում են նաեւ թմրանյութերի եւ թանկարժեք զարդերի անօրինական վաճառքի մեջ:
Գորնո-Բադախշանը երկրի ամենաաղքատ շրջաններից է`անաշխատունակության բարձր մակարդակով: Դիտորդները կարծում են, որ շրջանում առանց սոցիալ-տնտեսական հարցերի լուծման ընդդիմադիր տրամադրությունները կաճեն:
