նախընտրելի դարձնելԹուրքիայի ԱԳ նախարար Ահմեդ Դավութօղլուն հայտարարել է, որ իր երկիրը ցանկացած միջոց կձեռնարկի, եթե հարեւան Սիրիայից ահաբեկչության սպառնալիք լինի:
Լրագրողների հետ զրույցում Դավութօղլուն հստակեցրել է, որ Անկարան սպառնալիք է համարում անջատական Քրդստանի բանվորական կուսակցությանը եւ դրա սիրիական թեւը, ահաբեկչական միջազգային «Ալ Կաիդա» ցանցը եւ բռնության դիմող այլ կազմակերպություններ: Քաոսի դեպքում Սիրիայի միասնականությունը սպառնալիքի տակ կդրվի, նշել է նախարարը:
Թուրքիայի արտգործնախարարի խոսքով` Անկարայում «ի սկզբանե կանխատեսել են, որ Սիրիայում շատ ավելի բարդ կլինի, քան Լիբիայում եւ Եգիպտոսում»:
«Երեք տարբերակ ունենք: Առաջին` լինել Ասադի վարչակարգի կողմնակից: Սակայն այդ դեպքում ինչ կկատարվի մեր հեղինակության հետ: Երկրորդը չմիջամտելու քաղաքականությունն է, ինչպես Իրաքի դեպքում էր: Երրորդը Սիրիայի նկատմամբ թուրքական կառավարության ներկայումս վարած քաղաքականությունն է»,- նախարարի խոսքերը մեջբերում է «ՌԻԱ Նովոստին»:
Բուֆերային գոտի ստեղծելու առնչությամբ Դավութօղլուն նշել է, որ դա կկատարվի, եթե Սիրիայից փախստականների թիվը մոտենա 100 հազարի: Ընդ որում, այն կստեղծվի Սիրիայում, ոչ թե Թուրքիայում:
Ըստ նախարարի` սիրիական ճգնաժամը լուրջ քննություն էր ՄԱԿ-ի համար, սակայն այն դանդաղում է:
«Եթե ՄԱԿ-ը հստակ դիրքորոշում ցուցաբերեր, Ասադն այդ հանցագործությունները չէր կատարի», - մեջբերում է NTV-ին:
