ՆախընտրելիՉնայած Երեւան-Հալեպ-Երեւան չվերթի անեկամտաբերությանը, Ազգային ավիափոխադրող «Արմավիա» ընկերությունը, հավատարիմ մնալով իր խոսքին, այսօր` օգոստոսի 2-ին ժամը 14:01-ին իրականացրել է Երեւան- Հալեպ- Երեւան լրացուցիչ առաջին չվերթը: Այս մասին NEWS.am-ին հայտնեցին «Արմավիայի» լրատվական ծառայությունից:
««Արմավիա» ընկերությունը Երեւանից Հալեպ չվերթը իրականացրեց առանց ուղեւորների՝ պահանջարկի բացակայության պատճառով: Հալեպից Երեւան ինքնաթիռը, ըստ նախատեսվածի, «Զվարթնոց» օդանավակայան կժամանի օգոստոսի 2-ին ժամը 18:25-ին»,- հայտնեցին նրանք:
«Արմավիայի» փոխանցմամբ` Հալեպից Երեւան ուղեւորների թիվը ժամը 16:00-ի դրությանբ կազմում է 47 մարդ: Երեւան-Հալեպ-Երեւան չվերթը իրականացվում է 50 տեղանոց SAG-200 օդանավով :
Հիշեցնենք որ առաջին լրացուցիչ չվերթը նախատեսված էր օգոստոսի 1-ին, Բոինգ 108 տեղանոց օդանավով: Սակայն ուղեվորների բացակայության պատճառով այն չկայացավ: Նշվածից ելնելով 108 տեղանոց Բոինգ օդանավը օգոստոսի 2-ին փոխարինվեց SAG-200 օդանավով:
