նախընտրելի դարձնելՉի կարելի միանշանակ ասել, որ Հալեպի հայկական թաղամaսերը անցել են հակամարտող կողմերից որեւէ մեկին, քանի որ նրանց շրջակայքում տեղի ունեցող մշտական մարտերի ընթացքում նրանք ձեռքից ձեռք են անցնում: Այս մասին NEWS.am-ի թղթակցի հետ զրույցում հայտնել է Լիբանանում հրատարակվող հայկական «Ազդակ» թերթի գլխավոր խմբագիր Շահան Քանդահարյանը:
Նրա խոսքով, իրարամերժ տեղեկություններ են ստացվում այն մասին, որ հայկական թաղամասերը մեկ անցնում են կառավարական ուժերի, մեկ զինյալների հսկողության տակ: «Ներկայումս չի կարելի միանշանակ ասել, որ հայկական թաղամասերը գտնվում են այս կամ այն կողմի հսկողության ներքո»:
Ինչ վերաբերում է սիրիացի հայերին, ապա Քանդահարյանի խոսքով, այս պահին Սիրիայից Լիբանան փախստականների մեծ հոսք չկա: «Այժմ Լիբանանում կա սիրիացի հայերի մի քանի ընտանիք, ովքեր ժամանակավոր բնակվում են իրենց հարազատների մոտ, վերջնական փոխադրման մասին խոսք չկա: Մեծ թվով փախստականների դեպքում գործի կդրվեին հանրակացարանները, սակայն նրանք դատարկ են»,-նշել է Քանդահարյանը:
Ավելի վաղ NEWS.am-ը, վկայակոչելով Սիրիայի աղբյուրը, հայտնել էր, որ Հալեպի հայկական թաղամասը, ըստ պաշտոնապես չհաստատված տվյալների, անցել է Սիրիայի ապստամբ գրոհայինների վերահսկողության տակ:
Հալեպից հակասական տեղեկություններ են ստացվում, քանի որ Սիրիայի կառավարական բանակը փորձում է դիմակայել գրոհայիններին:
Սիրիական ՍԱՆԱ գործակալության հաղորդագրության համաձայն «զինված ուժերը շարունակում են պաշտպանել Հալեպ քաղաքը ահաբեկիչներից եւ վարձկաններից»:
