նախընտրելի դարձնելՂրղըզական խորհրդարանի պատգամավոր, ներքին գործերի նախկին նախարար Բոլոտ Շերը վարչապետի պաշտոնակատար Օմուրբեկ Բաբանովին երկու փամփուշտներով ծրար է ուղարկել: Այդկերպ խորհրդարանականը պատասխանել է իր հասցեին հնչած թալանի մասին մեղադրանքներին:
Ինչպես հայտնում է «24.kg»-ն, ավելի վաղ խորհրդարանական «Հանրապետության» խմբակցության նիստում վերջին «հեղափոխության» ընթացքում տեղի ունեցած թալանի մասնակիցների տեսանյութն էր ցուցադրվել: Թալանչիները վստահեցնում են, որ գործել են «Աթա Մեքեն» (Հայրենիք) կուսակցության քաղաքական մի խումբ գործիչների հրահանգով: Նշել էին Բոլոտ Շերի (նախկինում` Շերնիյազով), ինչպես նաեւ կուսակցության առաջնորդ, խորհրդարանի նախկին խոսնակ Օմուրբեկ Թեքեբաեւի ազգանունները:
«Հանրապետության» ներկայացուցիչները դրա հետ կապված պահանջել են հետաքննություն անցկացնել եւ կալանքի տակ առնել հիշատակված քաղաքական գործիչներին: «Աթա Մեքենը» եւ «Հանրապետությունը» մինչեւ վերջին ժամանակները մտնում էին իշխող կոալիցիայի կազմում: Սակայն նրանք դարձել են քաղաքական հակառակորդներ:
Պատգամավոր Բոլոտ Շերը բացատրել է` ինչի համար է պատրաստել երկու փամփուշտը: «Եթե քո այդ հանձնաժողովն ապացուցի իմ նվազագույն մասնակցությունը թալանին, ապա ես կօգտագործեմ իմ փամփուշտը` նման ամոթը մաքրելու համար, - դիմել է նա Բաբանովին: - Սակայն եթե նա ապացուցի, որ ես մեղավոր չեմ եւ դու փորձել ես ինձ վարկաբեկել, ապա երկրորդ փամփուշտը քոնն է: Այն նման կերպով օգտագործիր»:
Իր հերթին «Աթա Մեքենի» առաջնորդ Օմուրբեկ Թեքեբաեւը, որին եւս անդրադարձել են «Հանրապետության» հրապարակած մեղադրանքները, հայտարարել է, որ «չկրկնվելու համար Բաբանովին ռումբ կուղարկի»:
