նախընտրելի դարձնելԳիտնականները պարզել են, որ պոլիէթիլենիմինների խմբի նյութերը` պոլիէթիլենի եւ ազոտի միացությունները, ուժեղացնում են հակավարակային պատվաստանյութերի, այդ թվում` գրիպի, հերպեսի եւ ՄԻԱՎ-ի դեմ պատվաստանյութերի ազդեցությունը: Հոդվածը հրապարակվել է Nature Biotechnology ամսագրում:
Գիտնականների խմբի ղեկավար Քվենթին Սաթենթաուն` Օքսֆորդի համալսարանից, հայտնել է, որ ընդամենը մեկ պատվաստումից հետո գրիպից լիակատար պաշտպանության ձեռքբերումը չլսված բան է, անգամ մկների վրա փորձարկումների դեպքում:
Դա գիտնականներին վստահություն է ներշնչում, որ պոլիէթիլենիմիններն ունեն գրիպի կամ ՄԻԱՎ-ի վարակներից պաշտպանող պատվաստանյութերի հզոր հավելում դառնալու բոլոր հնարավորությունները:
Սաթենթաուն եւ նրա գործընկերները փորձել են միջոցներ գտնել, որոնք կբարձրացնեն վարակների դեմ դիմադրողականության պատվաստանյութերի ազդեցությունը:
Հոդվածի հեղինակները ուշադրություն են դարձրել պոլիէթիլենիմիններին, որոնք ակտիվ կիրառվում են մոլեկուլյար կենսաբանների կողմից: Գիտնականները աճեցրել են մկների սերունդ եւ այն բաժանել 3 խմբի: Նրանցից առաջինն ստացել է պատվաստանյութն առանց հավելման, երկրորդը` նյութի ազդեցությունն ավելացնող միջոցով, երրորդը` պոլիէթիլենիմինային հավելանյութով: Ըստ ուսումնասիրողների` պոլիէթիլենիմինը մաքուր պատվաստանյութի համեմատությամբ 100 անգամ ավելացրել է մկների արյան մեջ հակամարմինների թիվը, հայտնում է «ՌԻԱ Նովոստին»:
Համոզվելով պոլիէթիլենիմինի արդյունավետության մեջ` Սաթենթաուն եւ նրա գործընկերները նոր դեղամիջոցն ստուգել են հերպեսի (HSV-2) եւ գրիպի պատվաստանյութերում: Ըստ գիտնականների` մեկ պատվաստումն առնետներին պաշտպանել է վարակի մահացու չափաբաժնից` ի տարբերություն այլ պատվաստանյութերի:
