նախընտրելի դարձնելՕգոստոսի 30-ին Քուվեյթի Պետությունում ՀՀ դեսպան Ֆադեյ Չարչօղլյանը հանդիպում է ունեցել Քուվեյթի ալ-Ահմադի նահանգի նահանգապետ դոկտոր Իբրահիմ ալ-Դուայիջի հետ:
Հանդիպման ընթացքում նահանգապետը ներկայացրել է ալ-Ահմադի նահանգում իրականացվող ծրագրերի ընթացքն ու լուսաբանել նահանգի դերը երկրի տնտեսության զարգացման գործում:
ՀՀ դեսպանն իր հերթին անդրադարձել է Հայաստանի տնտեսական հնարավորություններին, մասնավորապես` գյուղատնտեսության, զբոսաշրջության, հանքարդյունաբերության, քիմիական արդյունաբերության եւ ենթակառուցվածքների բնագավառներում առկա ներուժին` ընդգծելով քուվեյթյան կողմի հետ փոխշահավետ համագործակցություն ծավալելու Հայաստանի նպատակադրվածությունը եւ պատրաստակամությունը: Նահանգապետի ուշադրությանն են ներկայացվել նաեւ ՀՀ ներդրումային հնարավորություններն ու տնտեսական զարգացման ծրագրերը, ինչպես նաեւ երկկողմ առեւտրատնտեսական հարաբերությունների բնագավառում կատարված աշխատանքներն ու նախատեսվող ծրագրերը:
Հանդիպման ավարտին ալ-Ահմադի նահանգապետը բարձր է գնահատել քուվեյթահայ համայնքի դերը երկրի բարգավաճման գործում` միաժամանակ ցանկություն հայտնելով այցելել Հայաստան ալ-Ահմադի նահանգի եւ Հայաստանի մարզերի միջեւ համագործակցության հեռանկարները քննարկելու նպատակով:
