նախընտրելի դարձնելԻրանի նախագահ Մամուդ Ահմադինեժադը խոստովանել է, որ արեւմտյան մի շարք երկրների կողմից կիրառած պատժամիջոցները ազդում են երկրի տնտեսության վրա, սակայն կառավարությունը պատրաստ է հաղթահարել այդ դժվարությունները: Այդ մասին նա հայտարարել է Իրանի պետական հեռուստատեսությամբ հեռարձակված հարցազրույցում:
Նա վստահություն է հայտնել, որ «նավթային հարցը» կլուծվի:
«Մենք նավթ ունենք, եւ աշխարհը դրա կարիքն ունի», - նշել է Իրանի նախագահը, հաղորդում է «ՌԻԱ Նովոստին» վկայակոչելով AFP-ին:
Իր հերթին rbc-ն, վկայակոչելով AP-ին հայտնում է, որ Ահմադինեժադը Արեւմուտքին մեղադրել է Իրանի դեմ գաղտնի պատերազմ ծավալելու մեջ` նկատի ունենալով երկրի տնտեսության նավթային եւ ֆինանսական հատվածների նկատմամբ պատժամիջոցները:
Նա նշել է, որ իր երկիրը ԱՄՆ-ի եւ այլ երկրների բարեկամն է, բացի Իսրայելից: Սակայն, ըստ նրա, ԱՄՆ-ում «իշխող շրջանակները» իսրայելական ազդեցության պատճառով չեն ցանկանում ամրապնդել իրանա-ամերիկյան կապերը:
Ըստ Միջազգային էներգետիկական գործակալության` իրանական նավթային արտահանոմը 4 միլիոն բարելից կրճատվել է մինչեւ 2,9 միլիոն բարելի:
Հիշեցնենք, որ ԵՄ-ն արգելել էր իրանական նավթի ներկրումը հուլիսի 1-ից, իսկ ԱՄՆ-ն սահմանափակումներ էր մտցրել իրանական բանկերի հետ գործարքների հարցում, այդ թվում նաեւ Կենտրոնական բանկի հետ:
