նախընտրելի դարձնելԱմերիկայի Հայկական Համագումարը իր հիացմունքն է հայտնում ԱՄՆ-ի Կոնգրեսի գրասենյակի եւ անդամների պատասխանի համար, որը հնչել է այն ժամանակ, երբ հայտնի է դարձել Ադրբեջանի նախագահ Իլհամ Ալիեւի կողմից` հայ սպային քնած ժամանակ գազանաբար կացնահարելու համար ցմահ դատապարտված Ռամիլ Սաֆարովին ներում շնորհելու մասին: Այս մասին ասվում է ԱՀՀ-ի հայտարարության մեջ:
Համագումարը անհանգստացած է այն հաղորդագրությունից, ըստ որի Ադրբեջանը կիրառել է իր ֆինանսական հնարավորությունները եւ թուրքական ազդեցությունը` Սաֆարովի արտահանձնման ապահովման համար, նաեւ վերջինիս զինվորական կոչման բարձրացման կապակցությամբ: Համագումարը, ինչպես նաեւ բարյացակամ բոլոր մարդիկ, ամեն ինչ կանեն, որպեսզի այս կեղտոտ պատմությունն ամբողջովին բացահայտվի: Սաֆարովը փոքրոգի ահաբեկչական գործողություն է իրականացրել` սպանելով քնած անպաշտպան մարդուն, իսկ Ալիեւի արարքը ավելի շատ է բացահայտում Ադրբեջանի իրական դեմքը` որպես տարածաշրջանի խաղաղությանը սպառնացող վտանգ: Համագումարը հստակորեն հաստատում է, որ ոչ մի դեպքում Լեռնային Ղարաբաղի Հանրապետությունը չի կարող վերադառնալ ադրբեջանական կառավարման որեւէ մի ձեւաչափի:
«Համագումարը ամենախիստ ձեւով քննադատում է Ադրբեջանի կողմից Ռամիլ Սաֆարովին ներման շնորհումը,-հայտնել է ԱՀՀ-ի գործադիր տնօրեն Բրայան Արդունին,-մենք նաեւ բարձր ենք գնահատում Կոնգրեսի գրասենյակի, Պետական վարչության սկզբնական հայտարարությունները: Նախագահ Իլհամ Ալիեւի արարքը համապատասխան է այն հռետորությանը, որով նա մշտապես ռազմական գործողություններով սպառնում է հայերին: Այս վերջին դեպքը միայն ընդգծում է Լեռնային Ղարաբաղում եւ Հայաստանում հայ ժողովրդի անվտանգության ապահովման անհրաժեշտությունը»,- ավելացրել է Արդունին:
